Dıpfeık pen qashyqtan basqarý: Ulttyq bank jańa qaýip týraly eskertti
ASTANA. KAZINFORM — Ulttyq bank jańa alaıaqtyq aıla beleń alǵanyn eskertedi, onda alaıaqtar adamnyń mobıldi qurylǵysy men jeke derekterine qol jetkizýge áreket qylady.
— Qaskóıler azamattardyń telefonyn qolǵa túsirý úshin túrli psıhologııalyq ádisterdi jıi qoldanady. Olar, ásirese, áýejaı, temirjol jáne avtovokzal mańy sııaqty halyq kóp jınalatyn oryndardy torýyldaıdy. Sebebi mundaı jerlerde azamattar asyǵys júretindikten, qyraǵylyqty joǵaltyp jatady.
Mysaly, alaıaqtar «shuǵyl qońyraý shalý kerek edi» degen syltaýmen kóshedegi adamnyń uıaly telefonyn surap alýy múmkin. Bul — qazir jıi kezdesetin tásildiń biri. Osy sátte qaskóıler bank qosymshalary arqyly aqsha aýdaryp úlgerýi nemese qurylǵyny qashyqtan basqarýǵa arnalǵan HopToDesk, RustDesk, RuDesktop, AnyDesk, TeamViewer sııaqty baǵdarlamalardy baıqatpaı ornatyp jiberýi yqtımal, — delingen habarlamada.
Mundaı baǵdarlamalardyń kómegimen alaıaqtar azamattyń telefonyn qashyqtan basqarýǵa múmkindik alady. Sóıtip, zańǵa qaıshy áreket jasap, SMS-kodqa, mobıldi qosymshalarǵa, memlekettik elektrondyq servısterge jáne derbes derekterge ońaı qol jetkizedi.
— Kóshede «tegin foto nemese vıdeo túsirip beremin» degen jeleýmen azamattardyń bıometrııalyq derekterin jınaıtyn alaıaqtardyń áreketi de úlken qaýip tóndirip tur. Olar óz kásibin jańadan bastaǵan fotograf nemese mobılograf retinde tanystyryp, «portfolıo jınap júrmin» degen syltaýmen qyzmetin tegin usynǵan bolady. Osylaısha qolǵa túsken foto-vıdeomaterıaldardy keıin jasandy ıntellekt kómegimen dıpfeık jasaý úshin qoldanýy múmkin. Budan bólek, mundaı materıaldar túrli alaıaqtyq shemalarda, sonyń ishinde jaqyndardan aqsha aýdarýdy suraıtyn jalǵan habarlamalardy taratý úshin de paıdalanylady, — delingen bank habarlamasynda.
Osyndaı alaıaqtyq áreketterdiń jıileýine baılanysty Qazaqstan Ulttyq banki azamattardy barynsha saq bolýǵa shaqyrady. Beıtanys adamǵa telefon bermegen durys. SMS-kodty, bank kartasynyń derektemesi men basqa da jeke málimetterdi úshinshi tarapqa aıtpaý kerek.
Eske sala ketetin jaıt, Ulttyq bank qyzmetkerleri eshqashan aýdıo/vıdeoqońyraý shalmaıdy, jeke tulǵalardyń shotyna qyzmet kórsetpeıdi jáne aqshalaı esep aıyrysý operatsııalaryn júrgizbeıdi.
Aıta ketelik Almaty oblysynda ınternet-alaıaqtyqqa qatysty 518 jalǵan habarlandyrý buǵattalǵan edi.
