Dıpfeık arqyly jalǵan aqparat taratý sharıǵatqa qaıshy

ASTANA. KAZINFORM — Islamda dıpfeık tehnologııasyn aldaý men zııan úshin qoldanýǵa tyıym salynady, dep habarlaıdy Qazaqstan Musylmandary Dinı basqarmasynyń baspasóz qyzmeti.

Sońǵy ýaqytta jasandy ıntellekt arqyly jasalatyn dıpfeık tehnologııasy keńinen taralyp keledi. Dıpfeık (deep learning — «tereń oqytý», fake — «jalǵan») — adamnyń shyn máninde aıtpaǵan sózderin aıtqandaı nemese istemegen is-áreketterin istegendeı etip kórsetetin jalǵan beınejazbalar jasaýǵa múmkindik beretin tehnologııa.

— Islam dini ǵylym men tehnologııanyń damýyna qarsy emes. Alaıda kez kelgen jańalyq adamzattyń ıgiligine, ádilettilik pen adamgershilik qaǵıdattaryna saı, sharıǵat aıasynda qoldanylýy tıis. Osyǵan baılanysty tehnologııa ıgi maqsatta paıdalanylsa — ruqsat, al zııan keltirý, aldaý nemese jamandyq jasaý úshin qoldanylsa — tyıym salynady. Dıpfeık arqyly jalǵan aqparat taratý, adamdardy aldaý, qoǵamda iritki salý sharıǵat boıynsha qatań túrde haram bolyp sanalady. Mundaı áreketter eldiń tynyshtyǵyna qaýip tóndirip, qoǵamnyń birligi men turaqtylyǵyna zııan keltirýi múmkin, — delingen basqarma taratqan aqparatta.

Paıǵambarymyz Muhammed (oǵan Allanyń salaýaty men sálemi bolsyn):
«Kim bizdi aldasa — ol bizden emes», — dep, aldaýdyń kez kelgen túrine tyıym salǵan.

Sondaı-aq ıslamda ózine de, ózgege de zııan keltirýge bolmaıdy. Bul jóninde hadıste:
«Ózine de, ózgege de zııan berýge bolmaıdy», — dep aıtylǵan.

Dıpfeık arqyly adamdardy qorqytý, bopsalaý nemese jalǵan aıyp taǵý adam ómiri men qaýipsizdigine qater tóndiredi. Al ıslam dini adam ómiriniń qaýipsizdigin eń basty qundylyqtardyń biri dep esepteıdi. Tipti qaljyń retinde qorqytýǵa da sharıǵatta tyıym salynǵan.

Osyǵan baılanysty dıpfeık tehnologııasyn paıdalanyp jalǵan aqparat taratýǵa, adamdardy aldaýǵa jáne zııan keltirýge ıslam dininde jol berilmeıdi.

Budan buryn QMDB qaıtys bolǵan adamnyń aǵzasyn tiri adamǵa salý «amanatqa qııanat» emes ekenin aıtqan edi.