Dintanýshy: Islam dininiń tek syrtqy formasyn qabyldaǵandar - adasqandar

ALMATY. QazAqparat – Islam dininiń tek syrtqy formasyn qabyldaǵan adamdar adasyp júr. Mundaı pikirimen Almaly aýdandyq ákimdigi apparatynda bolǵan kezdesýde QR UǴA ǴK fılosofııa, saıasattaný jáne dintaný ınstıtýtynyń aǵa ǵylymı qyzmetkeri, PHD doktory Almasbek Shaǵyrbaı bólisti, dep habarlaıdy QazAqparat tilshisi.

«Búgingi tańda din máselesi óte ózekti máselelerdiń biri. Qoǵamda ártúrli dinı aǵymdar boı kórsete bastady. Soǵan baılanysty bizdiń Almaty qalalyq Qoǵamdyq damý basqarmasy aqparattyq túsindirý tobyn qurdy. Bul - qashan jarylys bolady dep kútip otyrmaı, adamdar durys aqparat jetkizý maqsatynda qolǵa alynǵan shara. Elimizde qazir 1000-ǵa jýyq azamat ekstremızm men terrorızm baby boıynsha túrmede otyr. Jylyna 50-60 adam qosylyp otyrady», - dedi Almasbek Shaǵyrbaı.

Onyń aıtýynsha, kóptegen azamattar dinniń syrtqy atrıbýtıkasyn ǵana qabyldap, týra jolda júr ekenmin dep adasady.

«Osy otyrǵan azamattarymyzdyń ishinde qaı-qaısyńyz da salafızm dinı aǵymymen tanysqan bolarsyzdar. Óıtkeni, olardy syrtqy kıim atrıbýtıkasynan tanýǵa bolady. Bul azamattar ózge eldiń dástúri men mádenıetin din dep qabyldaǵan adamdar. Sondyqtan, olar ózge eldiń qundylyqtaryn bizge tańǵysy keledi. Bul adasýshylyq. Máselen, keıbiri namaz oqymaıtyn ata-anasyna qarsylyq bildiredi. Bizdiń salt dástúrdi joqqa shyǵarady. Jeti shelpek, tusaý kesý, shashý shashý sııaqty ǵuryptarǵa da qarsylyq bildiredi», - dedi Almasbek Shaǵyrbaı.

Dintanýshynyń ortaǵa salǵan taqyryby kópshiliktiń qyzyǵýshylyǵyn týǵyzdy.

Otyrǵandardyń arasynda bir qyzmetker óz pikirin de bildirdi.

«Men qoǵamdyq kólikte osyndaı, siz aıtqandaı, kıim kıetin azamattardy kórgenmin. Olardyń biriniń aıaǵyn basyp ketkende maǵan sondaı ashýlanyp, dórekilik kórsetip, tipti urýǵa deıin barǵan edi. Shynymyzdy aıtsaq, biz mundaı adamdardan qorqamyz. Qoǵamda úreı bar. Biz olardan qalaısha saqtana alamyz?» - dedi áıel.

Onyń saýalyna dintanýshy tómendegideı jaýap berdi.

«Sizder ondaı ahýal týyndaǵanda eń aldymen quzyrly organdarǵa habarlańyzdar. Aınalańyzda, týystaryńyzdyń arasynda, kúdikti jınalystar týraly estiseńizder, birden 102 nómirine habarlasqandaryńyz jón», - dedi Almasbek Shaǵyrbaı.

Dáristen soń tyńdarmandarǵa destrýktıvti dinı aǵymdardyń qaýpi týraly arnaıy vıdeofılm kórsetildi.

Almaty qalasy Qoǵamdyq damý basqarmasynyń monıtorıng jáne taldaý ortalyǵy jyl aıaǵyna deıin osy sııaqty 600-den astam is-shara uıymdastyrmaq. Jalpy sany 100 myńnan asa adam qamtý josparda bar. Bul is-sharalar qalamyzdyń barlyq áleýmettik toptaryn qamtıdy. Jalpy bilim berý mekemeleri oqýshylaryna, orta arnaıy, joǵary oqý oryndary stýdentterine jáne de destrýktıvtik aǵym ókilderi kóp shoǵyrlanǵan saýda keshenderinde basym kópshilik sharalar júrgiziledi.