Dintanýdy mindetti kýrs retinde joǵary oqý oryndaryna engizgen durys - professor Naǵıma Baıtenova
ALMATY. Qarashanyń 12-si. QazAqparat /Erlik Erjanuly/ - Dintaný mektepte ǵana emes, joǵary oqý oryndarynda da mindetti kýrs bolýy kerek. Bul búgin Almatyda ótip jatqan "Kertartpa dinı aǵymdarmen kúresti jetildirý: baǵyttary, jańa ádisteri" dep atalatyn dóńgelek ústel jıynynda aıtyldy,
dep habarlaıdy QazAqparat.
"Bul basqosýda kóterilip otyrǵan qoǵam úshin óte ózekti, kerek másele. Oǵan Qazaqstan halqy Assambleıasynyń sońǵy sessııasynda Elbasy da, ásirese jastardyń dinı jańa qurlymdardyń yqpalyna túsip qalatynyna erekshe nazar aýdarǵan bolatyn. Meniń oıymsha, sońǵy ýaqytta mektepke dintaný kýrsynyń engizilýi jaıdan-jaı emes. Bilim salasynda jumys jasaıtyn adam retinde bul tájirıbe logıkalyq jalǵasyn tabýy kerek dep oılaımyn. Mindetti dintaný kýrsyn joǵary oqý oryndarynda engizetin kez keldi", deıdi Qazaqtyń ál-Farabı atyndaǵy ulttyq ýnıversıtetiniń professory, fılosofııa ǵylymynyń doktory Naǵıma Baıtenova. Onyń aıtýynsha, BAQ halyqty dinı qurylymdardyń qyzmetinen habardar etip, kertartpa aǵymdardyń yqpalyna túsip qalýdan saqtandyryp otyrýy kerek. Bul sharaǵa mamandardy da tartýǵa bolady. Ǵalymnyń paıymdaýynsha, dinı aǵymdardy tirkeý kezinde olardyń qyzmeti men birlestikke kirgen adamdardyń odan shyǵý erkindigine mán berý qajet. Qazir kertartpa aǵymdardyń yqpalyna túsip qalyp, onyń qurbandyǵyna aınalǵan adamdarǵa kásibı kómek kórsetetin zańgerler, psıhologtar, dárigerler jetkiliksiz. Olqylyqtyń ornyn toltyrý úshin arnaıy uıymdar men aqparattyq-keńes berý ortalyqtaryn quryp, veb-saıt jasaý kerek.
