Dintaný páni balalardyń jas erekshelikterine qaraı oqytylady - BǴM

ASTANA. QazAqparat - 2019 jyly úshtildi bilim berý júıesi birden engizilmeıdi. Oǵan deıin barlyq oqý-ádistemelik baza ázirlenip, mektep muǵalimderi til kýrstarynan ótýi tıis. Sóıtip, jańa júıe birtindep engiziledi. Al, búgingi bilimniń jańartylǵan mazmunyna sáıkes «Álippemen» birge «Dintaný» pániniń ataýy da ózgertildi, dep xabarlaıdy QazAqparat tilshisi.

«2019 jyly tek 10-11 synyptarda ǵana, onyń ózinde jaratylystaný-matematıka klasstarynda tórt pánniń ekeýin tańdaı alady. Bıologııa, xımııa, fızıka jáne ınformatıka», - dedi Bilim jáne ǵylym mınıstrliginiń Bilimniń mazmuny jáne ádistemesi basqarmasynyń basshysy Talǵat Jákenov búgingi brıfıngte. Onyń aıtýynsha, mektep oqýshylary tańdaǵan pánderin aǵylshyn tilinde oqıtyn bolady.

Sondaı-aq ol «Álippeniń» atyn aýystyrý men dintaný sabaǵyn engizý boıynsha jýrnalısterdiń tarapynan qoıylǵan suraqtarǵa jaýap berdi.

«Álippeniń» ataýy ózgerse de, zaty ózgermedi. Ataýy «Saýat ashý» bolsa da, ishinde burynǵy - «Álippe». Bala búkil áripterdi úırenedi. Sosyn «Ana tiline» aýysady. Sondyqtan eshqandaı másele joq bul jerde. Al «Dintaný» páni týraly aıtar bolsaq, ol 2009 jyldan bastap mindetti pán retinde oqytylyp keldi. Bıylǵy jyldan bastap bul pánniń ataýy «Zaıyrlyq jáne dintaný negizderi» bolyp ózgertildi. Ony tek 9-shy synyptarda ǵana oqytady. Balalardyń jas erekshelikterine sáıkes, osy 9-synyp naǵyz ótpeli jas deıdi ǵoı, sol sebepti dál ýaqyttan bastap engizgendi jón kórdik. Odan buryn oqytý josparymyzda joq», - dedi T.Jákenov.