«Dintaný negizderi» oqýlyǵy - zaman talaby
ASTANA. QazAqparat - Dinı ahýaldyń ýaqyt óte kele bir orynda turmaı ózgeriske túsetindigi sebepti «Dintaný negizderi» oqýlyǵyna, onyń ishki mazmunyna degen suranys ta arta túspek. Oqýlyqtaǵy málimetterdiń dinı ahýaldyń qoǵamda oryn alý jaı-kúıine oraı ózgerip otyrýy qalypty nárse. Sol sebepti oqýlyqty jazý barysynda árdaıym zaman talaby men bilim alýshylar, jalpy aıtqanda qoǵam suranysyn eskerip otyrý qajet
Mysaly alǵash jaryq kórgen oqýlyq pen keıingi jyldary jaryq kórgen oqýlyq mazmunyn salystyra otyryp ondaǵy aıyrmashylyqtardy aıtsaq ta jetkilikti. 2011 jyly «Dintaný negizderi» oqýlyǵynyń ekinshi basylymy jaryqqa shyqty. Bilim jáne ǵylym mınıstrliginiń arnaıy buıryǵymen bekitilgen bul oqýlyqta dintaný negizderiniń páni, uǵymdary, qurylymy, tarıhy, álemdik - býdda, hrıstıan, ıslam dinderi, onyń baǵyttary, táýelsizdik jyldary elimizge taralǵan jańa dinı qozǵalystarǵa oqýshylar túsinigine saı, saraptama jasalǵan. Qazaqstandaǵy dinı jaǵdaıdyń tarıhy, ıslamnyń qazaq halqynyń turmysy men rýhanı ómirinde alatyn orny jáne Elbasy N.Á.Nazarbaevtyń tikeleı bastamasymen Astana qalasynda ótken Álemdik jáne dástúrli dinder kóshbasshylary sezderiniń materıaldaryna taldaý jasalyp, halyqaralyq qaýymdastyq deńgeıinde beıbitshilik pen dinaralyq kelisim ornatý saıasaty baıandalǵan. Dinı ahýaldyń turaqty bolýyna áser etýshi faktorlardyń biri bolǵan dinaralyq dıalog ustanymdary men dinaralyq qatynastardaǵy toleranttylyq máselesi oqýlyqta keńinen talqylanylady. Toleranttylyq qazirgi tańda dinaralyq dıalog konteksinde erekshe mańyzǵa ıe bolǵandyqtan, mektep oqýshylaryna osynyń máni men maqsatyn túsindirý mańyzdy. Al, búgingi tańda dinder dıalogynda qaı jaǵdaıda bolmasyn ózge senimge toleranttylyq tanytyp, syılastyqpen qaraý basty másele. «Dintaný negizderi» oqýlyǵy tek mektep qabyrǵasymen ǵana shektelip qoımaı, óz kezeginde otbasy tárbıesine de úlken septigin tıgizeri sózsiz. Oqýlyqtyń ata-analarǵa da berer málimeti men tanymy mol. Bunyń bári óz kezeginde jasóspirimniń syrttan kelgen dástúrli emes din aǵymdaryna erip ketýiniń aldyn alady. Búginge deıin jaryq kórgen dintaný oqýlyqtary birinde az qamtylǵan málimetter kelesi oqýlyqta aýqymdy túrde berilse, endi alda jaryq kóretin atalmysh oqýlyqta qazirgi zaman men qoǵam talabynan týyp otyrǵan suranysqa saı dinı ektremızm men terrorızm máselesine tıisti deńgeıde aqparatberilýi tıis. Qazaqstan Respýblıkasynda «Dintaný negizderi» pániniń oqytyla bastaýy - ustazdar qaýymynan úlken jaýapkershilikti talap etedi. Sebebi búgingi tańda mektep oqýshylary men jastarǵa rýhanııattylyqtyń tek dinmen ólshenbeıtindigin, dinaralyq tózimdilikti boıǵa sińirý qajettiligin uǵyndyrý asa ózekti. Pándi kez-kelgen salanyń ustazy emes tek arnaýly dıplomy bar dintanýshy mamandardyń berýi kerek. Oǵan sebep barlyq dinder ilimi men negizgi ustanymdarynda kózge kóriner-kórinbes asa názik tustardyń oryn alýy. Bul óz kezeginde ustazdan atalmysh pándi ótýi barysynda úlken uqyptylyqty qajet etedi. Sonymen qatar mektep ustazdary sabaq berý barysynda dástúrli dinderdiń tarıhymyz ben mádenıetimizdegi róline, rýhanı qundylyqtaryna mán berýi qajet. El aýmaǵynda áreket etýshi dástúrli emes dinder men onyń aǵymdaryn dástúrli dindermen salystyra otyra ara-jigin ashyp kórsetý zaman talabyna saı qoǵamdyq suranystan týyndap otyrǵan qajettilikterdiń biri. Kelesi másele pándi oqytý barysynda pánaralyq baılanystardy eskerý qajet. Materıaldyq dúnıeniń birligi, rýhanı jáne dinı úderisterdiń kúrdeliligi men qarama-qaıshylyǵyn mektep oqýshylary mektep pánderimen, onyń baǵdarlamalaryn birizdilikpen, birte-birte ıgerý barysynda jaqsy uǵyna túspek. Jalpy tıimdi ádisterdiń ishinen pánaralyq baılanystardy ornata bilýdi aıtar edik.
