Dınozavrdyń qańqasy 3 mln eýroǵa satyldy
NUR-SULTAN. QazAqparat – Parıj qalasynda satylymǵa shyǵarylǵan allozavrdyń qańqasy 3 mıllıon eýroǵa (shamamen 1,5 mlrd teńge) satyldy. Bul Drýo saýda úıinde qoıylǵan lottyń alǵashqy baǵasynan eki ese kóp, dep habarlaıdy QazAqparat Euronews-ke silteme jasap.
Súıeginiń 70 paıyzdaıy saqtalǵan qańqanyń bıiktigi úsh metrden asady, uzyndyǵy shamamen 10 metr. Dınozavr qańqasynyń jasy 150 mıllıon jyl. Eń iri jyrtqyshtyń biriniń qańqasyn satyp alǵan adamnyń esimi atalmaıdy. Antıkvarıat sarapshylar sońǵy ýaqytta dınozavr súıekterine erekshe qyzyǵýshylyq týyp otyrǵanyn aıtady.
«Osyndaı zatty satyp alýǵa qyzyǵýshylyq tanytqan jekemenshik murajaılar az emes, sebebi bul óte qyzyqty ári sırek eksponattar. Ol úılerinde osyndaı qańqany saqtap júrýge qumar jekemenshik satyp alýshylardy da qyzyqtyryp otyr», - dep atap ótti bássaýdashy Aleksandr Jıkello.
Dınozavrǵa qyzyǵatyndardyń kóp ekenin ótken aptada Nıý-Iorktegi Christie's bássaýdasynda ornatylǵan rekordtan da kórýge bolady. Telefon arqyly ótken saýda kezinde Ońtústik Dakotadaǵy Blek Hılls geologııalyq zertteý ınstıtýtynda saqtalyp kelgen Sten esimdi tırannozavr 32 mıllıon dollarǵa satylyp ketti.
