Dinniń negizi burmalanbaı, ol týraly ilim saıasat pen ıdeologııa qurbany bolmaýy kerek - Senat tóraǵasy
ASTANA. Jeltoqsannyń 2-si. QazAqparat /Rýslan Ǵabbasov/ - Búgingi tańda qol jetkizgen jetistikterimiz kóp. Degenmen, alar asýlar da alda.
Bul týraly búgin Álemdik jáne dástúrli dinder basshylary sezi hatshylyǵynyń ІH otyrysynda QR Parlamenti Senatynyń tóraǵasy Qasym-Jomart Toqaev málim etti, dep habarlaıdy QazAqparat.
«Álemdik jáne dástúrli dinder lıderleri seziniń qyzmetine belsendi aralasyp júrgen ár konfessııa ókili myńdaǵan, mıllıondaǵan adamdardyń amanaty, ıgi armany men asyl muratyn arqalap keledi. Al qarapaıym adamnyń armany da muraty da belgili. Ol - álemde baıandy beıbitshilik ornatý, qantógisti toqtatý, dinder úndestigine jol ashý. Amanaty - birlik pen yntymaqta baqytty ómir súrý»,- dedi Senat tóraǵasy.
Bul maqsattarǵa qol jetkizýdiń bir ǵana joly bar ekenine toqtalǵan ol, «ol úshin dinı tózimdilik, konstrýktıvti dıalog pen ózara senimdi ornatý qajet. Dinniń negizi burmalanbaı, ol týraly ilim saıasat pen ıdeologııa qurbany bolmaýy kerek. Bul - óte jaýapty mıssııa. Al onyń júzege asýy bizden bar kúsh-jigerimizdi biriktirýdi talap etedi. Sizderdi soǵan shaqyramyn», dedi.
