Dinmuhamed Qonaevtyń 100 jyldyǵyn atap ótýge arnalǵan is-sharalar jospary Úkimet Basshysynyń qol qoıýyna usynyldy - Eldar Qonaev
ALMATY. 23 tamyz. QazAqparat /Erlik Erjanuly/ - Qyrkúıek-qazan aılarynda Úkimet basshysynyń Dinmuhamed Qonaevtyń 100 jyldyǵyn atap ótýge arnalǵan arnaıy qaýlysy shyǵady.
Ony Halyqaralyq Qonaev qorynyń prezıdenti Eldar Qonaev QazAqparat tilshisine Dinmuhmed Ahmetulynyń qaıtys bolǵanyna 18 jyly tolýyna oraı ótkizilgen eske alý aptalyǵy kezinde aıtty.
«QR Prezıdenti Jarlyǵy boıynsha kórnekti qaıratkerlerdiń 100 jyldyq mereıtoıyn atap ótýge qatysty sharalar arnaıy Úkimet qaýlysy boıynsha júzege asady. Sondyqtan Halyqaralyq Qonaev qory men onyń týys-týǵandary men jaqyndary Mádenıet mınıstrligine D. Ahmetulynyń 2012 jyly 100 jyldyǵyn atap ótýge baılanysty óz jobasyn usynǵan bolatyn. Olar óz tarapynan byltyrǵy jyldan bastap osy sharaǵa baılanysty barlyq mınıstrlikter men oblystardan usynys-tilekter jınady. Qazir ol qoıý úshin Premer-Mınıstrdiń qaraýynda jatyr», - deıdi Eldar Asqaruly. Onyń aıtýynsha, Halyqaralyq Qonaev qorynyń qurmetti prezıdenti Sultan Jıenbaevty qabyldaǵan kezde QR Prezıdenti Nursultan Nazarbaev óz pikirin bildirip, Dinmuhamed Qonaevtyń 100 jyldyǵyna daıyndyqty bastaý kerek dep qala ákimdigine nusqaý bergen. Qazirgi tańda QR Ulttyq banki Dinmuhamed Qonaevtyń 100 jyldyǵyna arnalǵan eskertkish shaqanyń nusqasy jasalyp, ol maquldanǵan. Sondaı-aq Sháken Aımanov atyndaǵy «Qazaqfılm» kınostýdııasynda túsiriletin jańa fılmniń stsenarııi jazylyp jatyr. Al Aqparat jáne baılanys mınıstrligi kelesi jyly D.Qonaevtyń 100 jyldyǵyna oraı «Ótti dáýren osylaı», «Elý jyl el aǵasy» sııaqty kitaptardy qaıta basyp shyǵarmaq.
«Dinmuhamed Ahmetuly turǵan páterdi jalpy jurtshylyq áli kóre almaı otyr. Al D. Qonaev murajaı-úıinde jádigerlerdi ekspozıtsııalyq jaǵynan ǵana tamashalaýǵa múmkindik jasalǵan. Endi páterin de memorıaldyq mýzeıge aınaldyrý josparlanyp otyr. Qazir onda meniń kishi baýyrym turyp jatyr. Al Qonaevtyń jeke murajaıyn ashý máselesi áli óz sheshimin tapqan joq», - deıdi Qazaqstannyń Ombydaǵy Konsýly bop jumys jasap júrgen Eldar Qonaev.
