Dinmuhamed Qonaev murajaıy salynatyn oryn anyqtaldy
ALMATY. Mamyrdyń 18-i. QazAqparat /Erlik Erjanuly/ - Kórnekti memleket jáne qoǵam qaıratkeri Dinmuhamed Ahmetuly Qonav murajaıy salynatyn oryn anyqtaldy. Ony qala ákiminiń orynbasary Serik Seıdýmanov búgin ákimdikte Halyqaralyq murajaı kúnine oraı uıymdastyrylǵan alqaly jıynda aıtty,
dep habarlaıdy QazAqparat.
«Azdaǵan ózgeris engizgennen keıin Dinmuhamed Qonaev murajaıynyń qurylysyn bastaý kerek. Qazirgi jobada murajaı jolǵa tym jaqyn ornalasqan. Eger bári oıdaǵydaı bolsa, ony bir jarym jylda aıaqtaýǵa bolady. Ol qala kelbetin odan saıyn ajarlandyra túsedi», deıdi S. Seıdýmanov.
D. Qonaev murajaı-úıiniń dırektory Bolysbek Battalhanovtyń aıtýynsha, bul murajaıdyń jobasyn jasaǵan Halyqaralyq Qonaev qory. Eki qabatty qurylys kesheniniń kólemi 2 myń sharshy metr bolmaq. «Onyń qurylysy bıyl bastalady dep josparlanǵan edi. Alaıda qaǵaz jumystary uzaqqa sozylyp ketti. Sondyqtan áli kúnge deıin qurylystyń naqty qashan bastalatyny belgisiz bolyp qalýda. Jalpy búgingi tańda bizdiń qolymyzda D. Ahmetulyna qatysty 3,5 myń jádiger bar. Alaıda onyń 346-syn ǵana kelýshiler nazaryna usynyp otyrmyz. Bıyl jyl sońynda «Qonaevtyń 100 jyldyǵyna 100 shara» dep atalatyn jobamyz óz máresine jetedi», deıdi B. Battalhanov.
«D.A.Qonaev murajaı-úıi» memlekettik kommýnaldyq-qazynalyq kásiporyny QR Prezıdenti N.Nazarbaevtyń 1994 jylǵy aqpannyń 24-indegi qaýlysyna sáıkes quryldy. Ol Almaty qalasy ákimshiliginiń 2001 jyldyń qazan aıyndaǵy sheshimimen jáne Halyqaralyq D. Qonaev qorynyń kómegimen 2002 jyly qańtardyń 12-sinde áıgili qaıratkerdiń 90 jyldyǵyna oraı ashyldy. Ondaǵy ekspozıtsııalyq alań 210 sharshy metrdi quraıdy. Eki zalda D. Ahmetulynyń jeke qoldanǵan zattary, kádesyılary, jastyq shaǵyn beıneleıtin qujattary men fotosýretteri oryn alǵan. Eń qundy jádigerler: qarý-jaraqtar, ottyqtar kollektsııasy, jeke avto kóligi jáne jumys kabıneti.
