Dinmuhamed Qonaev murajaı-úıi Reseıdegi mádenı brend týraly halyqaralyq konferentsııadan oljaly oraldy
ALMATY. Sáýirdiń 2-si. QazAqparat /Erlik Erjanuly/ - Almatydaǵy D.Qonaev murajaı-úıi Omby qalasynda ótken "Mádenı brendter arqyly terrıtorııany jyljytý: jańa kommýnıkatsııalyq tehnologııalardy qoldaný" dep atalatyn halyqaralyq ǵylymı-tájirıbelik konferentsııadan oljaly qaıtty,
dep habarlaıdy QazAqparat.
Naýryzdyń 26-sy kúni ótken bul sharany Omby oblysynyń úkimeti, Omby qalasy mádenıet departamenti jáne Omby memlekettik pedagogıkalyq ýnıversıteti birigip uıymdastyrdy. Oǵan TMD elderindegi burynǵy keńestik respýblıkalardyń basshylaryna ornatylǵan birden-bir murajaı sanalatyn D. Qonaev murajaı-úıinyń qyzmetkerleri "Aımaqtardaǵy brend-adamdar: oqıǵa, tulǵa, eskertkish" (fılologııa, ónertaný, tarıh, arheologııa)" jáne "Terrıtorııalardaǵy mádenı brendıngtegi murajaılar men teatrlardyń róli" sektsııalarynda spıker bolýǵa shaqyrylǵan bolatyn. Onda murajaı dırektory Bolysbek Battalhanov pen Bas qor saqtaýshy Gúlmıra Bekmuratova 3 jobany mamandar nazaryna usyndy.
Bolysbek Zamanbekulynyń aıtýynsha, konferentsııa sońynda uıymdastyrýshylar murajaı isindegi kásibıligi úshin D. Qonaev murajaı-úıin alǵys hatpen marapattap, baǵaly syılyqtar tartý etken. Buǵan deıin olar ótken jyly Reseı Federatsııasy úkimetiniń qoldaýymen Omby memlekettik pedagogıkalyq ýnıversıteti uıymdastyrǵan jańa ınnovatsııalyq baǵdarlamalar týraly halyqaralyq baıqaýǵa qatysqan edi. Onda murajaıdyń "Qolmen ustap kór", "Kelýshilerdi qalaı kóbeıtý kerek", "Murajaıdyń jádigerlerin jańa túrde saqtaý" degen jobalaryn usynyp, olardyń úsheýi de baıqaýdyń fınalyna ótken. Onyń qorytyndysy osy aıdyń aıaǵyna taman belgili bolmaq.
