Dinmuhamed Qonaev murasyn zertteýshilerge "Qonaevtanýshy" ataǵy tabys etildi
ALMATY. Aqpannyń 24-i. QazAqparat /Erlik Erjanuly/ - Búgin Almatyda asa kórnekti qoǵam jáne memleket qaıratkeri Dinmuhamet Ahmetuly Qonaev murasyn zerttep nasıhattaǵandarǵa alǵash ret "Qonaevtanýshy" ataǵy tabys etildi,
dep habarlaıdy QazAqparat.
Ony D. Qonaev atyndaǵy ýnıversıtet pen D.Qonaev murajaı-úıi birlesip taǵaıyndap otyr. QR Prezıdenti N.Nazarbaevtyń D.A. Qonaev esimin máńgi eske qaldyrý týraly qaýlysyna 16 jyl tolýyna oraı uıymdastyrylǵan alqaly jıyn kezinde "Qonaevtanýshy" ataǵy óziniń alǵashqy ıelerin tapty. Olar - QR UǴA akademıkteri, ekonomıka ǵylymynyń doktory Edige Túrkebaev, tehnıka ǵylymynyń doktorlary Málik Asylbekov, Kópjasar Náribaev, Muhtar Áýezov murajaıynyń dırektory Dıar Qonaev, jazýshy Oraz Qaýǵabaı jáne Dinmuhamed Ahmetulynyń alǵashqy oqqaǵary Anatolıı Gorıaıov.
