Dinı jáne násildik turǵydaǵy qylmystar úshin jaýapqa tartýdy zańnamalyq túrde kúsheıtý qajet - N. Nazarbaev
Bul týraly búgin Astanadaǵy Nazarbaev Ýnıversıtetindegi ınteraktıvtik dárisi barysynda Qazaqstan Respýblıkasynyń Prezıdenti Nursultan Nazarbaev málim etti.
«Ulysaralyq jáne dinaralyq qarym-qatynastardyń turaqtylyǵy men kelisimin qamtamasyz etetin ınstıtýttardy damytý kerek. Áleýmettik, dinı kelispeýshilik, etnıkalyq kemsitýshilik, sondaı-aq osy turǵydaǵy qylmystar úshin jaýapqa tartý zańnamalyq sharalaryn kúsheıtý qajet», - dedi Memleket basshysy.
Osy oraıda Prezıdent Qazaqstan halqy Assambleıasynyń rólin budan ári qaraı da arttyrý kerektigin qadap aıtty.
Memleket basshysy qazaqstandyqtar ekstremızm men radıkalızmdi qabyldamaıtynyn, sonymen qatar el azamattary saıası bos sózge jáne áleýmettik alaýyzdyqqa árqashan da qarsy ekenin eskerip ótti.
