Dinı týrızm ýákiletti organ kelisimimen júzege asyrylady - Naıb múftıı Serikbaı qajy
ASTANA. QazAqparat - Dinı týrızm dinı máselemen aınalysatyn ýákiletti organ kelisimimen júzege asyrylady.
Bul týraly búgin elordada ótken «Qazirgi kezeńdegi ekstremızm men terrorızmniń aldyn alý men jolyn kesýdiń zańnamalyq jáne ınstıtýtsıonaldyq sharalary» taqyrybyndaǵy dóńgelek ústel otyrysy aıasynda QazAqparat tilshisine suhbat bergen «Haziret Sultan» meshitiniń bas ımamy, naıb múftıı Serikbaı qajy aıtty.
«Talqylanyp jatqan zań jobasynda bizdiń dinı ustanym men kózqarasymyzǵa baılanysty, jalpy azamattyq turǵydan alyp qaraǵanda dinı senim máselesindegi shekteýdi kórip otyrǵan joqpyz. Óıtkeni, biz 1992 jyldan keıin alǵash ret 2011 jyly Qazaqstandaǵy dinı birlestikter jaıyndaǵy zańdy qabyldaǵan edik. Osy Zańda da bul máseleler ashyq baıan etilgen. Din ilimin taratýdy, mıssonerlik jumystardy aıqyndap beretin mindetti túrde dinı birlestik ókili jáne olardyń dinı ilimdi taratý úshin belgili oryndary bolýy kerek degen máseleler sol Zańda aıqyndalǵan», - dedi ol.
Ekinshiden, bas ımamnyń aıtýynsha, Qazaqstanǵa keletin dinı ádebıetterdi jekelegen azamattar óziniń qajetinen, qoldanýynan artyq ákeletin bolsa, onda mindetti túrde saraptamadan ótkizý kerek degen talap engizilýde.
«Úshinshi másele - dinı týrızm. Onyń maqsaty - qajylyq pen umyra. Qazaqstanda qajylyq pen umyramen belgilengen bir mekeme aınalysý kerek degen talap joq. Sondyqtan qajylyq pen umyrany Qazaqstandaǵy jekelegen týrıstik operatorlar júzege asyra beretin. Endi dinı týrızm memlekettik dinı máselemen aınalysatyn ýákiletti organnyń jáne respýblıkalyq dinı birlestik kelisimimen solardyń erejelerimen júzege asyrylatyn bolady. Sebebi umyraǵa, qajylyqqa baryp, sol jaqta 2-3 aı dáris alyp, elge kelgennen keıin basqa aǵymdardy nasıhattaý faktileri bar», - dedi naıb múftıı Serikbaı qajy.
