Dinı mazmundaǵy sheteldik 45 saıttyń Qazaqstan aýmaǵynda taralýyna tyıym salyndy - Úkimet saǵaty
ASTANA. 17 maýsym. QazAqparat - Qazaqstannyń Din isteri agenttigi óz qyzmetin bastaǵan eki jyldan beri 4344 dinı kitap pen aqparattyq materıaldarǵa saraptama júrgizdi.
Búgin Parlament Májilisinde ótken Úkimet saǵaty barysynda QR Din isteri agenttiginiń tóraǵasy Qaırat Lama Sharıf osylaı málim etti.
«Qazirgi tańda 1923 dinı kitapqa dintaný saraptamasy júrgizilýde. Nátıjesinde 148 materıal boıynsha teris qorytyndy berildi. Dinı birlestikterdi qaıta tirkeý barysynda agenttik tarapynan 618 jarǵyǵa saraptama júrgizilip, 17-sine teris qorytyndy berildi», - deıdi agenttik basshysy.
Agenttik tóraǵasynyń aıtýynsha, rýhanı qaýipsizdikke qatysty mańyzdy másele - dinı ekstremıstik jáne lańkestik toptardyń aqparattyq keńistigine shekteý qoıý úshin dinı baǵyttaǵy ǵalamtor resýrstaryna baqylaý júrgizý.
«Osyǵan oraı, byltyr 1900-den astam saıtqa taldaý júrgizilip, nátıjesinde zańǵa qaısha ıdeıalary anyqtalǵan 45 sheteldik ǵalamtor resýrsynyń Qazaqstan aýmaǵyna taralýyna tosqaýyl qoıý jónindegi tıisti sot sheshimderi shyqty. Al aǵymdaǵy jyldyń birinshi toqsanynda bes júz saıttyń jumysyna taldaý júrgizilip, onyń ishinde zańǵa qaıshy aqparattardy qamtyǵan 20 ǵalamtor resýrsy jónindegi materıaldar prokýratýra organdaryna jiberildi», - deıdi Q. Lama Sharıf.
