Dinı mamandardy daıarlaý erekshe nazarǵa alynyp otyr
ASTANA. Qazannyń 18-i. QazAqparat /Rýslan Ǵabbasov/ - Dinı mamandardy daıarlaý erekshe nazarǵa alynyp otyr. Bul týraly búgin Astanadaǵy Ulttyq Akademııalyq kitaphanada ótken «Islam mádenıeti men bilimin qoldaý qorynyń» Qamqorlyq keńesi barysynda atalǵan qordyń atqarýshy dırektory Balǵabek Myrzaev aıtty.
Kadrlardy daıarlaý máselesine toqtalǵan ol, «eger kadrlar bilikti bolsa, olar jamaǵatqa durys baǵyt beredi. Biz osyǵan baılanysty dinı mamandardy daıarlaý kerektigin aıryqsha belgilep otyrmyz. Endi jyl saıyn 50 stýdentti Lıvııa, Mysyr, Túrkııa memleketterinde oqytyp, tıisti qoldaý kórsetip, keıinnen olardy Dinı basqarmaǵa maman retinde tartýdy kózdep otyrmyz»,-dedi.
B. Myrzaevtyń sózine qaraǵanda, shetelde tálim alyp kelgen el azamattary meshitterde jumysqa ornalasady. «Nátıjesinde meshitke kelgen jamaǵatqa olar durys dinı baǵytty kórsetip, jón silteýge qaýqarly bolady dep oılaımyz»,-dedi ol.
Atqarýshy dırektor qazirgi kezde birqatar stýdentter shetelge bilimin shyńdaý úshin jiberilgenin jetkizdi.
Atalǵan qor sonymen birge elimizdiń aýmaǵynda Qazaqstan musylmandary dinı basqarmasynda tirkelgen 2 myńnan astam meshitterde qyzmet atqaryp jatqan ımamdardyń biliktiligin arttyrý maqsatynda olardy qajetti kitaptarmen qamtamasyz etedi.
