Dinı qyzmet jáne dinı birlestikterge qatysty zań jobasy boıynsha qurylǵan jumys toby óz qorytyndysyn aıtty
ASTANA. 20 qyrkúıek. QazAqparat - Búgin QR Parlamenti Májilisi Tóraǵasynyń orynbasary Vladımır Bobrovtyń qatysýymen Zańnama jáne sot-quqyqtyq reforma komıtetiniń otyrysy ótti. Onda «Dinı qyzmet jáne dinı birlestikter týraly» zań jobasy talqyǵa salyndy. Zańnama jáne sot-quqyqtyq reforma komıtetiniń tóraǵasy Rahmet Muqashevtyń kirispe sózinen keıin jumys tobynyń jetekshisi Ramazan Sárpekov baıandama jasady, dep habarlaıdy Májilistiń Baspasóz qyzmeti.
Ramazan Sárpekov jumys tobyna 300-den astam usynystar kelip túskenin, onyń barlyǵy saraptaýdan ótip, 99 pozıtsııaǵa toptastyrylǵanyn málim etti. Zań jobasynyń maqsaty Qazaqstan Respýblıkasynyń dinı birlestikter týraly zańnamasyn dinı birlestikter qyzmeti men jeke tulǵalardyń dinı qyzmetiniń negizgi baǵyttaryn quqyqtyq retteý jolymen jetildirý bolyp tabylady.
Zań jobasy dinı birlestikterdi tirkeý máselelerin, dintaný saraptamasyn júrgizý negizderi men tártibin zańnamalyq turǵydan retteýdi jetildirýdi kózdeıdi, jekelegen uǵymdardy naqtylaıdy.
Zań jobasyn qaraý barysynda depýtattar zań jobasynyń normalaryn zań tehnıkasynyń qaǵıdalaryna sáıkes keltirýge baǵyttalǵan jáne redaktsııalyq-naqtylaý sıpatyndaǵy birqatar túzetýler engizdi.
Májilistiń barlyq komıtetteri zań jobasy boıynsha qorytyndylaryn berdi, olar zań jobasyn Qazaqstan Respýblıkasy Parlamenti Májilisiniń jalpy otyrysynyń qaraýyna engizýge bolady dep esepteıdi.
Komıtet Qazaqstan Respýblıkasynyń Din isteri agenttigi, Bas prokýratýrasy, Joǵarǵy Soty, Ádilet, Іshki ister, Qorǵanys, Baılanys jáne aqparat, Syrtqy ister, Bilim jáne ǵylym, Densaýlyq saqtaý jáne Mádenıet mınıstrlikteri, Qazaqstan Respýblıkasynyń Ulttyq qaýipsizdik komıteti, dinı birlestikter men ǵylymı qoǵamdastyq ókilderiniń qatysýymen jumys tobynyń birneshe otyrysyn ótkizdi.
Zań jobasyna usynylyp otyrǵan túzetýler salystyrma kestede baıandalǵan.
Osy aıtylǵandardyń negizinde Komıtet osy zań jobasyn Qazaqstan Respýblıkasy Parlamenti Májilisiniń jalpy otyrysynyń talqylaýyna engizýge bolady dep esepteıdi.
