«Dinı qyzmet jáne dinı birlestikter týraly» zań - el birligin arttyrýǵa septigin tıgizetin mańyzdy qujat - S. Baltabaeva

Qazaqstan Qajylary qaýymdastyǵynyń Soltústik Qazaqstan oblystyq fılıalynyń tóraıymy Sálıma qajy Baltabaeva osylaı málim etti.

«Tarıhtyń qaı kezeńin alsaq ta musylman qoǵamynda dinge kóńil bólinbegen kezderi bolmaǵan. Óıtkeni din sol qoǵamnyń negizgi quraly.«Dini myqty qoǵam - dińgegi myqty aǵash sekildi». Óz basym memlekettiń tiregi - din dep esepteımin. Keshegi Keńes dáýiri óz memleketinde dinsizdikti dáriptedi. Qazirgi ómir súrip otyrǵan qoǵam adam sanasyna qarama-qaıshy áser etetin kózqarastarǵa toly. Onyń qaısysy durys, qaısysy teris ekendigin uǵynyp bilý de ońaılyqpen sheshilmeıdi»,- deıdi Sálıma qajy Baltabaeva.

Onyń paıymynsha, syrttan kelgen dinı aǵymdar, teledıdardaǵy ult múddesine qaıshy keletin habarlar men túsirilimderdiń júıeli túrde ótkizýleri jylystap qoǵamnan tolyq oryn alyp úlgere bastaǵan. Olardyń jastardy óz yryqtaryna kedergisiz kóndirip alǵanyn da qoǵam baıqamaı qaldy. «Sondyqtan da, «Dinı qyzmet jáne dinı birlestikter týraly» zańnyń memleket tarapynan qoldaý tapqanyna qýanyp otyrmyz. Allanyń qalaýymen táýelsizdikke qol jetkizdik. Sol táýelsizdiktiń arqasynda biz rýhanı muramyzdy qaıta jańǵyrttyq. Dáıim elimiz tynysh, Otanymyz aman, dinimiz ben halqymyzdyń yntymaǵy kúsheıe bersin», - deıdi ol.