Dinı kitaptary bar shekara buzýshy ustaldy

ASTANA. QazAqparat - Saryaǵash shekara otrıadyna qarasty «Darhan» zastavasynyń shekara jasaǵy memlekettik shekarany óziniń qalaýynsha buzyp ótýge tyrysqan azamatty ustady, dep habarlaıdy QR UQK ShQ baspasóz qyzmeti.

Basqarý pýltine sıgnal túsken sátte shekara zastavasy «Dabyl» belgisi boıynsha kóterilgen. Atalǵan ýchastokqa kelip jetkende, shekarashylar qorshaý sharbaǵyn buzyp ótken áldekimniń izin baıqady. Іz boıynsha qaraǵanda shekara buzýshy Qazaqstannan Ózbekstanǵa qaraı ketip bara jatqanǵa uqsaıdy.

Kóp uzamaı shekarashylar shekara buzýshyny ustady. Ol 32 jastaǵy Ózbekstan azamaty bolyp shyqty. Qaltasynan 530 AQSh dollary, dinı sıpattaǵy kitaptar tabyldy. Ózbekstan-Qazaqstan memlekettik shekarasyn 2012 jyldyń qańtar aıynda ótkizý beketinen tys jerde kesip ótkendigi anyqtaldy.

Atalǵan derek boıynsha OQO Saryaǵash aýdandyq prokýratýrasy habarlandyryldy.