«Dinı ister agenttigi quryldy, zań qashan ózgeredi» - respýblıkalyq basylymdarǵa sholý
***
«Egemen Qazaqstan» basylymy búgingi sanynda «Kemshiligi kóp bıýdjet» degen taqyryppen maqala jarııalady. Onda elimizdiń Keden odaǵyna kirýi túsimderdi arttyrý úshin oń alǵysharttar jasaǵandyǵy aıtylady. Alaıda bul salada da kemshilikter bar ekeni belgili bolyp otyr. Elimizden taýarlardy áketý kezinde kedendik áketý bajdaryn tóleýden jaltarý tásilderiniń biri atalǵan taýarlardy erkin saýda aımaǵyna shyǵaryp, keden bajdary salynbaıtyn elderge qaıta eksportqa shyǵaryp otyrǵan. Kvazımemlekettik sýbektiler qyzmeti de ótkir synǵa alyndy. 2009 jyly 138 aktsıonerlik qoǵam men jaýapkershiligi shekteýli seriktestiktiń tek 69-y ǵana dıvıdend tólegen. Sol 2009 jylmen salystyrǵanda debıtorlyq bereshektiń 1,6 esege (45,8 mıllıard teńgege) óskeni baıqalady.
Sondaı-aq atalmysh basylymnyń betinde qyzylordalyq Erjan Baıtilestiń «Til taqyrybyn tym saıasılandyryp jiberdik» degen maqalasy jarııalandy. Avtor onda memlekettik tildi damytýǵa qatysty óziniń oılarymen bólise kele: «Barlap qarasań, týǵan tilge jany kúıetin, ana tilin ardaqtaıtyn adam kóp sııaqty. Bıik minberlerden qazaq tiliniń qaıǵysyn aıtyp, «qurdymǵa ketip barady» dep ústel toqpaqtaıtyndar da jetkilikti. Qazaq tili úshin qabyrǵasy sógile maqala silteıtinderdiń sanyna jete almaımyz. Búginde til týraly erinbegenniń erni jybyrlaıdy. Jalqaýǵa deıin jazady. Qysqasy, qazaq til saıasılanyp ketti»,-deıdi.
***
«Talıbterdi túrtkilegen... tórteý». «Aıqyn» basylymynyń búgingi sanynda osyndaı taqyryppen maqala jarııalandy. Onda «Talıban» ekstremıstik qozǵalysy óziniń arnaıy joldaýynda Qazaqstan Aýǵanstanǵa ásker jibergen jaǵdaıda onyń aımaqta jaǵymsyz saldary bolatyndyǵyn eskertkendigi jazylǵan. Bul jóninde Reuters agenttigi aqparat taratqan. Qazaqstandyq depýtattar aýǵan sodyrlarynyń negizsiz aqparatqa súıengenderin aıtsa, táýelsiz sarapshylar qaýipsizdik sharalaryn kúsheıtýge shaqyrady.
Sondaı-aq osy basylymnyń habarlaýynsha, Prezıdenttiń Jarlyǵymen taratylǵan Dinı ister komıteti Úkimet qurylymyndaǵy agenttikke aınaldy. Islam mádenıeti men bilimin qoldaý qorynyń bastaýymen senbi kúni bas qosqan QMDB ókilderi, burynǵy Dinı ister komıtetiniń basshylyǵy, «Shákirt» ıslam oqý oryndarynyń túlekteri» qoǵamdyq birlestiginiń ókilderi men jýrnalıster qaýymy din salasynda qordalanǵan máselelerdi talqylaýmen qatar, dinı ister agenttiginiń bolashaǵyn da sóz etti. Sarapshylar agenttikti qurýmen qatar, «Dinder týraly» zańǵa tıisti ózgerister men tolyqtyrýlar engizý qajet degen oıda. Atalmysh jıynda kóterilgen dinge qatysty osy jáne ózge máseleler jóninde «Aıqyn» gazetiniń búgingi sanyndaǵy «Dinı ister agenttigi quryldy, zań qashan ózgeredi» degen maqaladan bile alasyzdar.
***
«Alash aınasy» basylymy búgingi sanynda «IPO-ny qaıtkende jalpyhalyqtyq etemiz?» degen taqyryppen maqala jarııalady. Atalmysh maqalaǵa «IPO-ny qaıtkende jalpyhalyqtyq etemiz?» degen taqyrypta Almatyda ótken dóńgelek ústal otyrysynda kóterilgen máseleler arqaý bolǵan. Basylymnyń jazýynsha, elimizde ulttyq kompanııalardyń aktsııalaryn jergilikti qor naryǵyna shyǵarý, ári onyń jalpyǵa birdeı qoljetimdi bolýy turǵysynan saıası sheshim qabyldanǵan-tuǵyn. Al Úkimetke 1 shildege deıin aktsııasy qor naryǵyna shyǵarylatyn ulttyq kompanııalardyń tizimn naqtylaý tapsyrylǵan bolatyn. Degenmen bul ıdeıanyń júgen qaqtyryp, qamshy saldyrmaı erkin júriske túsip ketýi qıynǵa soǵyp tur.
Sondaı-aq atalmysh basylym tarıh ǵylymynyń doktory, professor Seıfýlla Sapanovpen bolǵan suhbatty jarııalapty. Onda professor álemde oryn alyp otyrǵan saıası oqıǵalar men din máselelerine qatysty oılaryn bildire kele: «Islam áleminen qaýiptenbeý kerek. Menińshe, bul ıdeologııalyq kertartpa saıasattan qalǵan mura sııaqtanady. Bir jaǵynan, ıslam memleketteri qazirgi kezde damýdyń úlgisin kórsetip jatqanyn umytpaǵan durys. Arab nemese ıslam renessansy deımiz be, áıteýir, qazir ıslam álemine degen kózqaras búkil álemde ózgerýde. Tipti buryndary damyǵan Batys memleketteriniń ózinde buryn musylmandarǵa jabaıy kózqaras bolǵany ras. Al qazir Batystyń jańa tehnologııasyn, mádenıetin meńgergender - musylmandar»,-deıdi. Atalmysh suhbat «Alash aınasy» basylymynyń búgingi sanyndaǵy «Islamdyq uıymdarǵa degen keri kózqarasty qaıta qaraýda Qazaqstan óz sózin aıtýy kerek» degen taqyryppen berilip otyr.
***
«Kazahstanskaıa pravda» basylymynyń jazýynsha, keshe Bilim jáne ǵylym mınıstri Baqytjan Jumaǵulov Májiliste ótken úkimet saǵytynda depýtattardy bilim berý salasynda oryn alatyn sony ózgerister men jańalyqtardan habardar etken. B.Jumaǵulovtyń málimetterinshe, sońǵy 10 jylda bilim jáne ǵylym salasynda bólingen qarjy kólemi 7,5 esege artqan. Bul eldiń ishki jalpy óniminiń 4,2 paıyzy. Al bıylǵy jyly Bilim jáne ǵylym mınıstrligi jylda bólinetin qarjydan bólek qosymsha 22,5 mıllıard teńge alatyn boldy. Bul qarjy mektepterdiń qurylysy men ustazdardyń jalaqylaryn arttyrýǵa jumsalmaq. Ustazdar qaýymyna kelesi jyldan bastap aılyq jalaqylaryna 30 paıyzdyq ústememen qatar taǵy qosymsha qarjy tólenetin bolady. Sondaı-aq mınıstrlik 2015 jylǵa deıin eldegi stýdentterdiń 80 paıyzyn jataqhanamen qamtamasyz etpek. Úkimet saǵatynda kóterilgen osy jáne ózge de máseleler «Kazahstanskaıa pravda» basylymynda «V fokýse vnımanııa obrazovanıe» atty taqyryppen jarııalanǵan.
