Dinı ekstremızm taralýynyń basty sebebi – bilimsizdik

ALMATY. QazAqparat - Dinı ekstremızm men destrýktıvti dinı aǵymdardyń taralýynyń basty sebebi bilimsizdikte jatyr. Búgin dintanýshy, ál-Farabı atyndaǵy QazUÝ aǵa oqytýshysy, dintaný magıstri Elnar Berikbaev №97 mektepte bolǵan túsindirý jumystary barysynda osylaı aıtty, dep habarlaıdy QazAqparat tilshisi.

Ustaz uǵynyqty tilmen 47 balanyń aldynda psevdodinı aǵymdardyń qaýpi týraly aıtty.

Otyrys basynda aldymen Nıtstsadaǵy, Anglııadaǵy teraktilerdiń sýretteri kórsetildi. Odan keıin áńgimeniń tórkini Qazaqstandaǵy teraktilerge oıysty.

«Terrorızm – jahandyq problema ekenin kórsetkim keldi. Qazir qanshama adam osynyń kesirinen taǵdyry talqan bolyp túrmelerde jatyr. Buryn mundaı jaǵdaı keńes odaǵy kezinde bolmaǵan edi. Óıtkeni ol kezde gazetter, telearnalarda ıdeologııalyq saıasat myqty bolatyn. Qazir kópshilikti ǵalamtor baýrap alǵan. Adamdardy teris aǵymǵa túsirý ınternet, áleýmettik jeliler arqyly júredi. Ońtústik Qazaqstan oblysynda óziniń VKontakte jelisindegi paraqshasynda ekstremıstik baǵyttaǵy aqparatty taratqany úshin er adam sottalyp ketti. Sender tek ózderińe ǵana emes, aınalańdaǵy synyptastaryń, tanystaryńdy da baqylap júrýleriń kerek. Sizderdi bir oı mazalasa, bólisińizder. Jalǵyz emessizder. Bul iske tutas qoǵam bolyp atsalysady. Bizdiń eń aldymen ulttyq qundylyqtarymyz, mádenıetimiz, dúnıetanymymyz, úlkenge qurmet, kishige izet qylatyn ıdeologııamyz basty orynda bolýy tıis. Sizder sanǵasyrlar boıy qalyptasqan qazaq ultynyń urpaǵysyzdar. Bizdiń elde konfessııalaralyq kelisim ornaǵan. Ol da – bizdiń qundylyqtarymyzdyń biri», - dedi Elnar Berikbaev.

Kezdesý sońynda ustaz oqýshylarǵa statıstıkalyq derekterdi kórsetti.