Dinı ekstremızm qurbany bolǵan áıeldiń oqıǵasy Abaevqa qatty áser etti

ASTANA. QazAqparat - Qazaqstan azamatshasy Ásel Bazarbaeva Qazaqstan halqy Assambleıasynyń XXV sessııasynda QR Prezıdenti Nursultan Nazarbaevqa dinı aǵymnan qalaı qashyp shyqqanyn aıtyp berdi. Áseldiń bul áńgimesi QR Aqparat jáne kommýnıkatsııalar mınıstri Dáýren Abaevqa qatty áser etken, dep habarlaıdy QazAqparat Ortalyq kommýnıkatsııalar qyzmetine silteme jasap.

«Memleket basshysynyń qatysýymen QHA sessııasy ótti. Óte qyzyq áńgimeler aıtyldy. Árbir oqıǵa derekti fılmge arqaý bola alady. Men Ásel Bazarbaevanyń bastan keshken oqıǵasynan úlken áser aldym. Ol dıstrýktıvti dinı aǵymnyń qurbany bolǵany anyqtaldy. Jas qyz radıkalızmnen sytylyp shyǵyp, dástúrli dinge oraldy. Onyń radıkalızmnen bas tartýyna olardyń ata-anadan ketýin talap etýi túrtki bolypty. Bul bizdiń halyqtyń otbasylyq dástúri áli myqty ekendigin kórsetedi. Qazir ol ózi sııaqty áıelderge, týǵan-týystary, otbasyna qaıta oralýlaryna kómek kórsetip júr», - dedi mınıstr «Habar» telearnasyndaǵy «Ashyq dıalog» atty baǵdarlamada.

Aıta keteıik, Ásel Bazarbaeva qazir tórt balanyń anasy atanyp otyr. Mektep formasyn jetkizetin shaǵyn ǵana bıznespen aınalysady. Qazirgi kezde memlekettik áleýmettik tapsyrystarǵa da qatysa bastaǵan.

Sonymen qatar Ásel dinı ekstremızmnen zardap shekken adamdardy ońaltýmen aınalysyp júr.