Dinı ekstremıstik baǵyty úshin sottalǵandardyń kózqarasyn ózgertý ońaı emes - M.Ázilhanov
ASTANA. QazAqparat - Ekstremıstik kózqarastaǵy árbir azamatpen erekshe jumys júrgizilip jatyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Din isteri agenttiginiń tóraǵasy Marat Ázilhanov málim etti.
«Kezinde ekstremızmmen túrmege otyryp, onyń ol jerde qalaı otyratyny, erteń qoǵamǵa qalaı oralatyny, bolmasa sol jerde júrip, janyndaǵylarǵa qandaı áser etetini úlken ári kúrdeli másele. Bul Din isteri agenttigi men basqa da memlekettik organdarynyń nazarynan tys qalmaq emes. Osyndaı árbir azamatpen erekshe jumys júrgizilip jatyr», - dedi ol.
«Senim-nanym degen óte názik dúnıe, osy oraıda adamdarmen jumys júrgizgende olardyń kózqarastaryn ózgertý aıtarlyqtaı ońaı sharýa emes. Sondyqtan sondaı azamattarmen kúndelikti túsindirý jumystary kóptep júrgizilip jatyr. Bul baǵyttaǵy sharalarǵa el óńirlerindegi ımamdar da qatysýda. Bizdiń basty maqsatymyz - osyndaı azamattarymyz dinı ekstremıstik ustanymynan bas tartyp, qoǵamǵa aralasqanda, búlik shyǵarmaıtyndaı jaǵdaıdy qalyptastyrý», - dedi agenttik basshysy.
Sondaı-aq M.Ázilhanov atalmysh jazamen sottalǵandardyń bir jerge shoǵyrlanbaǵanyn, olardyń ár jerde jazalaryn ótep jatqandyǵyn jetkizdi.
