Dinı birlestikterdi qaıta tirkeý úderisi 24 qazanǵa deıin aıaqtalýy tıis - Q.Lama Sharıf
ASTANA. 13 maýsym. QazAqparat - Dinı birlestikterdi qaıta tirkeý úderisi 24 qazanǵa deıin aıaqtalýy tıis. Bul týraly búgin QR Úkimeti janyndaǵy Dinı birlestiktermen baılanystar jónindegi keńestiń otyrysynda elimizdiń Din ister agenttiginiń tóraǵasy Qaırat Lama Sharıf aıtty.
Onyń atap ótýinshe, qazirgi ýaqytta birqatar dinı birlestikter ózderiniń quryltaı qujattaryn tirkeýge usynǵan. Ádilet mınıstrliginde respýblıkalyq dinı birlestik mártebesimen Qazaqstan musylmandary dinı basqarmasy tirkeýden ótýde. Budan keıin respýblıka boıynsha QMDB fılıaldary retinde meshitterdi tirkeý jumystary júrgiziledi.
«Sondyqtan tıisti organdarǵa, ıaǵnı halyqqa qyzmet kórsetý ortalyqtaryna, Ádilet departamentteri men basqarmalaryna quryltaı qujattaryn ýaqtyly ári sapaly túrde qarastyrýdy qamtamasyz etý usynylady», - dedi ol.
Bul rette QR din isteri agenttigi tarapynan tıisinshe dintaný saraptamasy júrgiziletindigin basa aıtqan Q.Lama-Sharıf: «Qaıta tirkeý úderisi ústimizdegi jyldyń 24 qazanynda aıaqtalýy tıis jáne bizdiń maqsatymyz - barynsha tynysh, tııanaqty túrde bul jumysty aıaqtaý», - dedi.
Agenttik basshysynyń aıtýynsha, bul merzim aıaqtalǵannan keıin ádilet organdary qaıta tirkeýden ótpeıtin dinı birlestikterdi jabý jóninde bastama kóterýi tıis.
