Dinı basqarma jáne Din isteri agenttigi ózara memorandým qabyldady
ASTANA. 16 qańtar. QazAqparat - Qazaqstan musylmandary dinı basqarmasy jáne QR Din isteri agenttigi ózara yntymaqtastyq týraly Kelisim memorandýmyna qol qoıdy, dep habarlady QMDB baspasóz qyzmetinen.
Bas múftı Erjan qajy Malǵajyuly QR Din isteri agenttiginiń tóraǵasy Marat Ázilhanovty qabyldady. Taraptar elimizdegi dinı turaqtylyqty saqtaý, ultaralyq tatýlyqty arttyrý, konfessııalar men dinı birlestikter arasyndaǵy kelisimdi kúsheıtý syndy birqatar máselelerdi sóz etti. QMDB Ǵulamalar keńesi men Tóralqa músheleri, oblystyń bas ımamdary qatysqan basqosýda Bas múftı ortaq Kelisimniń máni men mańyzyna hám maqsatyna toqtaldy. «Alla taǵala barshamyzǵa beıbit zamanda ómir súrýdi násip etti. Qudaıǵa shúkir, Táýelsizdigimizdiń arqasynda Islam dinin nasıhattaýdyń, adamdar arasynda birlikti nyǵaıtýdyń múmkindigi týdy. Bárimizdiń ılegenimiz bir teriniń pushpaǵy. Ol - eldiń birligi, musylmandardyń yntymaǵy. Danyshpan Abaı atamyz: «Birińdi qazaq biriń dos, kórmeseń istiń bári bos» deıdi. Olaı bolsa, ózara birigip, elimizdiń bolashaǵy úshin eńbek etýimiz kerek. Biz «bólshekteı ber de, bıleı ber» ıdeologııasynan zardap shekken, sonyń taýqymetin kórgen ultpyz. Alla taǵala Quranda: «Túp-túgel Allanyń jibinen (dininen) bekem ustańdar da, bólinbeńder» («Álı Imran» súresi, 103-aıat) deıdi. Qazir din men tildi saqtaýdy, mádenıetimiz ben ádebıetimizdi jańǵyrtyp, jastardy jaqsylyqqa shaqyrýdy oılaıtyn zaman. Osy maqsatta Qazaqstan musylmandary dinı basqarmasy men QR Din isteri agenttigi ózara yntymaqtastyq týraly Kelisim qabyldady. Ortaq kelisim elimizdegi dinı tatýlyqty nyǵaıtýǵa, ultaralyq qarym-qatynasty jandandyrýǵa septıgin tıgizbek. Sonymen qatar, qoǵamǵa qaýipti aǵymdardyń ıdeologııasyna tosqaýyl qoıýǵa, taǵy basqa dinı máselelerdi sheshýge yqpal etetinine senim bildiremin», - dedi Erjan qajy Malǵajyuly. QR Din isteri agenttiginiń tóraǵasy Marat Ázilhanov Dinı basqarma men Din isteri agenttigi Zań aıasynda, óz quzyretteri sheńberinde birlesken jobalardy júzege asyratynyn jetkizdi. «Maqsatymyz - qoǵamdaǵy tatýlyq pen ózara kelisimdi kúsheıtýge birlese yqpal etý», - dedi ol. Qos tóraǵa sóz alǵannan keıin yntymaqtastyq memorandýmyna qol qoıyp, qujat almasty. Taraptar qabyldanǵan qarar aıasynda konferentsııalar, dóńgelek ústelder, forýmdar ótkizedi.
