Dinı basqarma meshitterge «Ashyq» júıesin engizýdi qoldaıdy

NUR-SULTAN. QazAqparat – QMDB tóraǵasy, Bas múftı Naýryzbaı qajy Taǵanuly meshitterge «Ashyq» mobıldi qosymshasyn engizý týraly suraqtarǵa jaýap berdi, dep habarlaıdy QazAqparat.

«Meshitterge «Ashyq» júıesi engizile me? Engizilse, bul jumystar qashan bastalady?», - degen suraq qoıyldy Ortalyq kommýnıkatsııalar qyzmetindegi baspasóz máslıhatynda. «Qazirgi ýaqytta bizdiń tájirıbemizde ashyq júıesi engizilgen joq. Degenmen, biz oǵan daıyn ekenimizdi Densaýlyq saqtaý mınıstrligine habardar ettik. Eger de meshitterge ashyq júıesi qoıylsa, biz ony qoldaımyz jáne jamaǵatpen jumys isteýge daıyn ekenimizdi jetkizemiz. Árıne, biz úshin eń bastysy – eldiń, halyqtyń amandyǵy, densaýlyǵy», - dep jaýap berdi Naýryzbaı qajy Taǵanuly.

Aıta keteıik, bıyl qurbandyq shalatyn arnaıy oryndarda «ASHYQ» mobıldi qosymshasy iske qosylady. «Qyzyl» jáne «sary» mártebesi bar azamattar qurbandyq shalý oryndaryna jiberilmeıdi, onda «kók», «jasyl» mártebesi barlar ǵana kirgiziledi.

Bıyl 20 shilde – Qurban aıt merekesiniń birinshi kúni. Al arapa kúni 19 shildege sáıkes keledi.