Dindi fanatızmmen qabyldaý radıkalızmge jol ashady - Ermekbaev
ASTANA. QazAqparat - Qazaqstandyqtardyń 87 paıyzy ózderin Qudaıǵa senemiz de aıtady. Bul týraly Senattaǵy «Dinı qyzmet jáne dinı birlestikter týraly» QR Zańyn iske asyrý barysyna arnalǵan dóńgelek ústelde QR Din isteri jáne azamattyq qoǵam mınıstri Nurlan Ermekbaev málim etti, dep habarlaıdy QazAqparat.
«Elimizde sońǵy 25 jylda dinı ahýal birshama ózgerdi. Búginde qazaqstandyqtardyń 87 paıyzy ózderin Qudaıǵa senemiz de aıtsa, olardyń ishinde tek 16 paıyzy ǵana dinı joralǵylardy turaqty ustanady. Biz rýhanı qundylyqtardyń kózi retinde dinı senimge qarsy emespiz. Barlyq dinı senimderde moraldyq-etıkalyq normalary aıtylǵan, olar bizdi qaıyrymdylyqqa ári shydamdylyqqa úıretedi. Biz dinı birlestiktermen qoǵamnyń rýhanı damýynyń mindetterin sheshýde áriptestik qatynastar qurýdamyz, biraq ol úshin birqatar sharttar saqtalýy tıis. Birinshiden, din árkimniń óziniń jeke isi, ol saıasılanbaýy jáne zańdardyń ornyn almaýy qajet. Ekinshiden, din tek rýhanı qundylyqtardy dáripteıdi, ózge kózqarastaǵylardy kemsitpeıdi ári aıyptamaıdy. Dindarlyqtyń ósý qarqyny tıisti mádenıet pen bilimniń qalyptasýynan ozyp ketse, ol rýhanı adamgershilik qundylyqtardy burmalanyp túsinýge ákelýi múmkin. Dindi fanatızmmen jáne sózbe-sóz qabyldaý - kóp jaǵdaıda radıkalızmge jol ashady», - dep pikirin bildirdi mınıstr.
Onyń atap ótýinshe, keıbir elderdiń tájirıbesi kórsetkendeı, destrýktıvti aǵymdar fýndamentalızm men eskirgen dogmalardy taratady. Dindi saıasılandyryp, onyń yqpalyn qoǵamnyń barlyq salasynda kúsheıtýge tyrysady. Al din salasyn saıasılandyrý men dinı uıymdardy saıasatqa aralastyrý ádette negatıvti nátıjege aparatyny belgili. Memleket, qoǵam jáne dinniń qarym-qatynastary júıesindegi bundaı úrdister búkil álemge tán. Sońǵy onjyldyqta olar Qazaqstanda da kórinis tabýda.
«Ótken jeti jyldyń ishinde bizdiń elimizde terrorıstik belsendiliktiń birneshe faktileri oryn alǵany belgili. 2010 jyldan beri 16 sondaı fakti boldy. Keıbir dinge qatty berilip ketken azamattarymyzǵa bizdiń halqymyzǵa tán emes dinı ıdeologııanyń yqpaly kúsheıdi. Dindarlyq jeleýmen adamdardyń medıtsınalyq qyzmetten bas tartyp, balalaryn mektepke jibermeı, basqa elderge tán qara jamylǵy kıim kıip, kópshilikke ádeıi kórinýi faktileri kóp», - dep toqtaldy N. Ermekbaev.
Osy oraıda vedomstvo basshysy búginde bundaı qubylystar Qazaqstannyń kóp óńirlerinde kezdesetinin, ol belgili bir deńgeıde jergilikti memlekettik organdardyń jumysyna da baılanysty ekenin jetkizdi.
