Dindi burmalaı túsindirýshiler ony óziniń qara nıetin júzege asyratyn qarýǵa aınaldyrǵysy keledi - QR Prezıdentiniń keńesshisi
ALMATY. 4 naýryz. QazAqparat - Keıbireýler bizdiń qyzdarymyzdyń ómirin tar aıada shektegisi keledi. Bul týraly QR Prezıdentiniń keńesshisi, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova búgin Almatyda «Áıel jáne din» degen taqyrypta ótip jatqan halyqaralyq forýmda aıtty.
«Búgingi Forýmnyń «Áıel jáne din» dep atalýy - qazirgi zamannyń ótkir máselesi dinniń áıelder qaýymy úshin de ózekti ekendigin kórsetedi. Din, dindegi áıeldiń orny - qazirgi kezde barsha elderde qyzý talqylanyp júrgen taqyryp. Óıtkeni, din adamzat qundylyqtaryn saqtap, baıytýdy kózdeıdi. Al ony burmalaı túsindirýshiler dindi óziniń qara nıetin júzege asyratyn qarýǵa aınaldyrǵysy keledi», - deıdi G.Ábdiqalyqova. Onyń aıtýynsha, Qazaqstan Respýblıkasynyń Konstıtýtsııasy dinı senim bostandyǵyna kepildik beredi. Biraq bostandyqty sanaly túrde, aqylmen tańdaýymyz kerek. Óıtkeni adamnyń ómirlik salty, turmysy, kóp jaǵdaıda búkil ómiri soǵan baılanysty bolady. Bizdiń halqymyzdyń óz mádenıeti, óz dástúri men salty bar. Búkil shyǵys halyqtarynyń ishinde qazaq áıelderi erekshe mártebege ıe. Tarıhqa kóz júgirtsek, erlermen birdeı memleketti basqarý isine belsene aralasqan áıelder az emes. Saýatsyzdyqty joıý, mádenıetti, óner men ǵylymdy damytý sııaqty mańyzdy máselelerdi sheshýge qatysqandar jastarǵa laıyqty úlgi-ónege bola alady.
