«Dinder terrorızmge qarsy» konferentsııasyna búkil dúnıe júziniń parlamentshileri men dinı qaıratkerleri keledi
ASTANA. QazAqparat - 31 mamyrda Astanada Beıbitshilik jáne kelisim saraıynda «Dinder terrorızmge qarsy» halyqaralyq konferentsııasy ótedi, dep habarlady Senattyń baspasóz qyzmeti.
Atalǵan shara Qazaqstan Respýblıkasynyń Prezıdenti Nursultan Nazarbaevtyń BUU Bas Assambleıasynyń 70-shi sessııasynda usynǵan halyqaralyq terrorızmge qarsy is-qımyl jónindegi bastamalaryn iske asyrý aıasynda ótkiziledi. Konferentsııa 1 maýsymda ótetin Álemdik jáne dástúrli dinder lıderleri Sezi Hatshylyǵynyń kezekti otyrysynyń qarsańynda bolady.
Qazaqstan Parlamenti Senatynyń tóraǵasy, Álemdik jáne dástúrli dinder lıderleri Sezi Hatshylyǵynyń basshysy Qasym-Jomart Toqaev atap ótkendeı, «Dinder terrorızmge qarsy» konferentsııasynyń ereksheligi oǵan qatysýshylardyń biregeı quramynda bolyp otyr. «Parlamentshiler, dinı qaıratkerler, halyqaralyq uıymdardyń basshylary men sarapshylar terrorızmge qarsy kúres máselelerin talqylaý úshin alǵash ret bir ústel basynda jınalmaq. Qatysýshylardyń osyndaı ókiletti quramy Qazaqstannyń bastamashylyǵymen shaqyrylǵan forýmnyń aıryqsha mańyzdylyǵyn kórsetedi», - dedi tóraǵa.
«Konferentsııa Álemdik jáne dástúrli dinder lıderleriniń Sezi aıasynda bastalǵan saıası jáne dinı qaıratkerler únqatysýynyń qısyndy jalǵasyna aınalady. Ózderińizge málim bolǵandaı, BUU Bas hatshysy, Iordanııa Koroli, Fınlıandııa Prezıdenti, EQYU, IYU jáne basqa da halyqaralyq uıymdardyń basshylary alǵash ret qatysqan, 2015 jyly ótken besinshi Sezd jańa turpattaǵy únqatysýdyń qajettigin naqtylaı tústi», - dep atap ótti Senat tóraǵasy.
Q.Toqaevtyń aıtýynsha, «Álem. HHІ ǵasyr» Manıfesindegi Qazaqstan Prezıdenti kótergen jahandyq qaýipsizdikti nyǵaıtý jónindegi ıdeıalardy damytý konferentsııanyń mańyzdy taqyrybyna aınalmaq. «Halyqaralyq qoǵamdastyq Birikken Ulttar Uıymynyń úılestirýshi rólin, onyń ishinde terrorızmmen kúreske qatysty qyzmetin nyǵaıtýy qajet. Forým barysynda biz Qazaqstan kóshbasshysynyń adamzatty soǵystar men qaqtyǵystardan qutqarý jónindegi bastamalaryn talqylaýdy josparlap otyrmyz», - dedi tóraǵa.
Tóraǵanyń pikirinshe, «Dinder terrorızmge qarsy» konferentsııasy terrorızmmen kúrestegi dinı qaıratkerlerdiń negizgi rólin aıqyndaýmen qatar, antıterrorıstik qyzmettiń parlamenttik ólshemin nyǵaıtýǵa arnalǵan. Halyqaralyq terrorızmge qarsy quqyqtyq is-qımyldy jetildirip, osy qaterge qarsy kúreste parlamenttik dıplomatııanyń áleýetin iske qosý mańyzdy».
Konferentsııa jumysyna EQYU Parlamenttik Assambleıasynyń Bas hatshysy Roberto Montella, Birikken Arab Ámirlikteri Federaldyq ulttyq keńesiniń tóraǵasy Amal Abdalla al-Kýbeısı, Mysyrdyń ýaqyp isteri jónindegi mınıstri Mýhtar Djýma, «Órkenıetter únqatysýy» Dúnıejúzilik qoǵamdyq forýmy Halyqaralyq úılestirý komıtetiniń tóraǵasy Valter Shvımmer, Halyqaralyq beıbitshilik ınstıtýtynyń prezıdenti Tere Rod-Larsen, TMD PAA, BUU Órkenıetter alıansy, EQYU DIAQB, AÓSShK jáne Korol Abdalla atyndaǵy Dinaralyq jáne mádenıetaralyq únqatysý Halyqaralyq ortalyǵynyń ókilderi qatysady. Jalpy, álemniń 41 elinen, onyń ishinde Aýstrııa, Ázerbaıjan, Aýǵanstan, Belarýs, Ulybrıtanııa, Majarstan, Germanııa, Grekııa, Grýzııa, Iran, Italııa, Qytaı, Qyrǵyzstan, Latvııa, Nıderlandy, Pákistan, Reseı, Rýmynııa, Saýd Arabııasy, Tájikstan, Túrkııa, Frantsııa, Chehııa, Shvetsııadan jáne basqa da elderden 63 delegatsııa qatysady dep kútilýde.
Odan basqa, forýmǵa ıslam, hrıstıan, ıýdaızm, býddızm, daosızm jáne ındýızm dinderinen ókilettik etetin Álemdik jáne dástúrli dinder lıderleri Sezi Hatshylyǵynyń músheleri qatysady. Atap aıtqanda, Astanaǵa Al-Azhar ýnıversıtetiniń, Dúnıejúzilik ıslam lıgasynyń, Máskeý Patrıarhatynyń, Dinaralyq únqatysý jónindegi Papa Keńesiniń (Vatıkan), Dúıejúzilik Lıýteran Federatsııasynyń, Anglıkan shirkeýiniń, Konstantınopol Patrıarhatynyń, Armıan apostol shirkeýiniń, Izraıl bas sefardtyq jáne ashkenazdyq ravvınderiniń, Dúnıejúzilik býddıster qaýymdastyǵynyń, Dao assotsıatsııasynyń, «Somaııa Bharatııa Sanskrıtı Pıtam» úndi mádenıet ortalyǵy men t.b. uıymdardyń basshylary men ókilderi keledi.
