Dinder sezin damytýdyń 2023-2033 jyldarǵa arnalǵan tujyrymdamasyn ázirleý qajet - Toqaev
Álemdik jáne dástúrli dinder kóshbasshylary VII seziniń jabylý rásiminiń aldynda Qorytyndy deklaratsııa jarııalandy.
Qasym-Jomart Toqaev forýmnyń eki kúndik jumysyn qorytyndylaı kele, qazaq jeri osy kúnderi túrli mádenıetterdiń syndarly suhbat ortalyǵyna aınalǵanyn atap ótti. Dúnıejúziniń bedeldi dinbasylary osy jerde bir shańyraqtyń astyna jınaldy.
– Shyn máninde, bárimizdiń maqsatymyz – bir. Bul – órkenıetter úndestigin ornatý jáne beıbitshilik pen turaqtylyqty nyǵaıtý. Sezde kóptegen salmaqty oı, salıqaly pikir aıtyldy. Onyń bári bizdiń úılesimdi álem qurý jolyndaǵy is-áreketimizge oń yqpalyn tıgizedi dep sanaımyn. Bizdiń bastamamyzǵa qoldaý kórsetip, Sezge arnaıy kelgen dinı kóshbasshylarǵa, saıasatkerler men halyqaralyq uıym ókilderine alǵys aıtamyn. Sondaı-aq forýmdy ótkizýge belsene atsalysqan dıplomattarǵa, volonterlerge, jýrnalıster men basqa da azamattarǵa rızashylyǵymdy bildiremin, – dedi Memleket basshysy.
Prezıdent Qazaqstan halqynyń jáne jeke óziniń atynan Rım Papasy Frantsıskke elimizge tarıhı sapar jasap, Sezd jumysyna qatysqany úshin taǵy da rızashylyǵyn bildirdi.
– Sizdiń álemdik qoǵamdastyqqa úndeýińiz búkil álemdegi mıllıondaǵan adamdarǵa úmit pen senim syılady, – dedi Memleket basshysy.
Qazaqstan Prezıdenti Álemdik jáne dástúrli dinder kóshbasshylarynyń VII sezi tarıhtyń betburys kezeńinde ótkenine toqtaldy. Pandemııadan keıin geostrategııalyq jaǵdaı ýshyqqan kezde jahandyq deńgeıde órkenıetaralyq dıalog pen senimdi nyǵaıtý úshin jańa ádister izdeý asa mańyzdy. Prezıdent forýmnyń qorytyndysy bul basty mindetti sheshýge eleýli úles qosady dep sanaıdy.
– Biz birlese otyryp, ulttardyń birin-biri shettetýine, memleketterdiń kúıreýine jáne halyqaralyq qatynastar júıesiniń buzylýyna yqpal etetin «kúsh kórsetý saıasaty» men «arazdyq tilin» dáripteýdi synǵa aldyq. Búginde dinderdiń bitimgerlik áleýetin paıdalanyp, uzaq merzimdi turaqtylyqqa qol jetkizý úshin rýhanı kóshbasshylardyń kúsh-jigerin biriktirý buryn-sońdy bolmaǵan mańyzǵa ıe. Barlyq dinniń negizinde gýmanıstik ıdealdar, adam ómiriniń joǵary qundylyqtary, beıbitshilik pen jasampazdyqqa umtylý sııaqty izgi amaldar jatady. Osy negizgi qaǵıdattar rýhanı salada ǵana emes, sondaı-aq memleketterdiń áleýmettik-ekonomıkalyq damýy men halyqaralyq saıasatta da kórinis tabýy qajet, – dedi Qasym-Jomart Toqaev.
Sonymen qatar Memleket basshysy ulttyq kúızelister men jahandyq daǵdarystardyń qaınar kózi sanalatyn teńsizdiktiń barlyq túrin eńserý talqylanǵan negizgi máselelerdiń biri bolǵanyn atap ótti. Tsıfrlyq jáne genderlik problemalarǵa, áleýmettik bólinisterdi joıý isindegi bilim men dinı aǵartý salasynyń atqaratyn róline basa mán berildi.
Qazaqstan Prezıdenti ekonomıkalyq ósim men rýhanı-adamgershilik damýdyń arasyndaǵy teńdikke qol jetkizý joldaryn qarastyrý áli de ózekti ekenin atap ótti.
– Dinder kóshbasshylary rýhanı jáne tehnologııalyq damýdy úılesimdi ushtastyrý qajet ekenin dáleldeı alatynyna senimdimin, – dedi Prezıdent.
Qasym-Jomart Toqaev rýhanı kóshbasshylardyń bedeli búkil adamzattyń ıgiligi úshin qazirgi álemdegi qaıshylyqtardy eńserýge septigin tıgizetinine senimdi.
Memleket basshysy Sezdiń qorytyndy qujatyna erekshe nazar aýdardy. Prezıdent forým qorytyndysy boıynsha búgin mazmundy ári jan-jaqty pysyqtalǵan Deklaratsııa qabyldanatynyn jetkizdi. Onyń aıtýynsha, bul mańyzdy kontseptýaldy qujat irgeli máselelerdi qamtıdy jáne úkimetterge, saıası kóshbasshylarǵa, halyqaralyq uıymdarǵa baǵdar bere alady.
– Bizdiń ortaq mindetimiz – Deklaratsııanyń kontseptýaldy erejeleri men ıdeıalaryn dáıekti túrde ilgeriletý. Sonymen qatar Álemdik jáne dástúrli dinder kóshbasshylary sezin damytýdyń 2023-2033 jyldarǵa arnalǵan tujyrymdamasyn ázirleý qajet. Qujatta bizdiń forýmnyń yqpalyn odan ári kúsheıtýdiń naqty qadamdary men kezeńderi qamtylýy kerek, – dedi Memleket basshysy.
Qasym-Jomart Toqaev sózin qorytyndylaı kele, Qazaqstan óziniń ishki jáne syrtqy saıasatynyń basymdyqtaryna sáıkes, Sezdiń dáıekti qyzmetin tolyqtaı qoldaıtynyn atap ótti.
Sonymen qatar Sezdiń jabylý rásiminde Rım Papasy Frantsısk, «Ál-Azhar» ýnıversıtetiniń Joǵarǵy ımamy sheıh Ahmad at-Taıeb, Máskeý Patrıarhatynyń Syrtqy shirkeýlik baılanystar departamentiniń tóraǵasy, Volokolamsk mıtropolıti Antonıı, Saýd Arabııasy Koroldiginiń Islam isteri, ýaǵyz jáne nasıhat jónindegi mınıstri sheıh Abdýllatıf ben Abdýlazız Abdrahman Ál ash-Sheıh, Izraıldiń Bas ashkenaz ravvıni Davıd Laý, sondaı-aq Álemdik jáne dástúrli dinder kóshbasshylary sezi Hatshylyǵynyń basshysy – Qazaqstan Respýblıkasy Parlament Senatynyń tóraǵasy Máýlen Áshimbaev sóz sóıledi.
