Dinder Sezi hatshylyǵynda pandemııadan keıingi álem men dinı basshylar róli talqylanady – Vıtse-mınıstr
Kelesi jyly ótetin álemdik jáne dástúrli din kóshbasshylarynyń XIX sezi qarsańynda búgin Sezd hatshylyǵynyń jumys toby otyrys ótkizdi.
«Búgin jumys tobynyń otyrysyna 20 elden 27 delegatsııa kelip otyr, onyń ishinde úlken din uıymdarynyń basshylary kóptegen elderden, jan-jaqty kontınentten jınaldy. Bul bizdiń jınalysymyzdyń jáne kelesi jyly ótetin sezdiń rólin de, deńngeıin de kórsetip jatyr. Máselen, Rım papasynyń keńsesinen attashe keldi. Sondyqtan búgin kún kelesi jylǵy sezd taqyrybyn, onda qandaı máseleler qaralýy kerektigin talqylap jatyrmyz. Biz Sezdi qabyldaýshy el bolǵandyqtan óz usynymdarymyzdy berdik jáne qonaqtardyń da usynymyn surap otyrmyz», - dedi S. Egizbaev tilshilerge bergen suhbatynda.
Onyń aıtýynsha, negizgi naqty sheshimder erteńgi Hatshylyq otyrysynda qabyldanady.
«Jumys toby atynan óz usynymdarymyzdy ázirlep jatyrmyz. Biz usynǵan eń basty taqyryp – pandemııadan keıingi álem qandaı bolady, onyń ishinde din basshylarynyń róli qandaı bolady degen másele. Bul taqyryp bir aýyzdan qoldandy, tek qana saıası lıderler emes, din lıderleriniń de pozıtsııalary álemde estilgeni durys dedi. Odan keıin otyrys jobasynda áıel adamnyń jańa álemdegi, qoǵamdaǵy, saıasattaǵy róli taqyryby tur. Ózińiz biletin saıası oqıǵalar, aýǵan elderinde bop jatqan oqıǵalarǵa baılanysty áıel adamnyń otbasy, qoǵam, jalpy álemdegi róli taqyrybyna da qyzyǵýshylyqpen qarap otyr. Biraq bul usynymdy naqty bekitken joqpyz, ony ekinshi otyrysta talqylaımyz», - dedi S. Egizbaev.
Aıta keteıik, 6 qazan kúni Beıbitshilik jáne kelisim saraıynda QR Parlamenti Senatynyń spıkeri, Álemdik jáne dástúrli dinder lıderleri Sezi hatshylyǵynyń basshysy Máýlen Áshimbaevtyń tóraǵalyǵymen Álemdik jáne dástúrli dinder lıderleri Sezi Hatshylyǵynyń XIX otyrysy ótedi.
