Dinder kóshbasshylarynyń sezi: Jumys toby alǵashqy otyrysyn ótkizdi

NUR-SULTAN. QazAqparat – Kelesi jyly ótetin Álemdik jáne dástúrli din kóshbasshylarynyń XIX sezi qarsańynda Sezd hatshylyǵynyń jumys toby otyrys ótkizdi, dep habarlaıdy QazAqparat.

Jumys tobynyń otyrysyna Álemdik jáne dástúrli dinder kóshbasshylary seziniń maqsattary men mindetterin ilgeriletý jónindegi ýákil, N. Nazarbaev ortalyǵyndaǵy «Konfessııaaralyq jáne órkenıetaralyq dıalogty damytý ortalyǵy» KEAQ basqarma tóraǵasy Bolat Sársenbaev basshylyq etti.

«Jumys tobynyń otyrysy – Hatshylyqtyń jumys organy. Munda 14 adam qatysýda. Búgin biz Hatshylyqtyń kún tártibin talqylaımyz. Negizinen Álemdik jáne dástúrli din kóshbasshylarynyń jetinshi sezine daıyndyq boıynsha qandaı jumystar júrgizilip jatqanyn talqylaımyz. Belgili bir krıterııler, qujattar, sezd ótkizý ýaqyty men kúni talqylanady. Búgin usynymdar jasalyp, túpkilikti sheshim erteń Álemdik jáne dástúrli dinder kóshbasshylary sezi Hatshylyǵynyń basshysy, QR Parlamenti Senatynyń tóraǵasy Máýlen Áshimbaev basqaratyn hatshylyqta qabyldanatyn bolady», - dedi B. Sársenbaev tilshilerge bergen suhbatynda.

Álemdik jáne dástúrli dinder kóshbasshylary sezi Hatshylyǵynyń jumys toby otyrysyna Saýd Arabııasy, Ulybrıtanııa, Úndistan, Pákistan, Iran, BAÁ, Vatıkan, Izraıl, Koreıadan 11 ókil qatysty.

«Sezd Hatshylyǵynda 20 el usynylǵan. Oǵan din kóshbasshylary, dinı birlestikterdiń jetekshileri, dintanýmen baılanysty ınstıtýttar men ýnıversıtetterdiń basshylary qatysady. Sondaı-aq, Almatydaǵy Nur-Múbarak Qazaq-Egıpet ýnıversıtetiniń rektory, doktor Muhammed ash-Shahhat Ál-Djındı de bar. Biz barlyq máselelerdi talqylaımyz, sheshim qabyldaımyz jáne usynymdar retinde erteń hatshylyq qatysýshylaryna usynylatyn bolady», - dep atap ótti Bolat Sársenbaev.