Dinder kóshbasshylarynyń kelesi sezi 2025 jyly ótedi

NUR-SULTAN. QazAqparat – Álemdik jáne dástúrli dinder kóshbasshylarynyń VIII sezi 2025 jyly ótedi. Bul týraly Senat tóraǵasy – Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev aıtty, dep habarlaıdy QazAqparat tilshisi.

«Hatshylyqtyń kelesi otyrysyn 2023 jyldyń qyrkúıek aıynda elordamyzda ótkizemiz. Sonymen qatar kelesi sezdi 2025 jyly Nur-Sultan qalasynda ótkizetin bolamyz. Ortaq sheshimimiz bar», - dedi Máýlen Áshimbaev sezd hatshylyǵynyń HH otyrysynda.

Búgingi otyrys barysynda sezde qabyldanatyn Deklaratsııa jobasy maquldandy. Sonymen qatar hatshylyq otyrysynyń hattamasy qabyldandy.

Aıta keteıik, 14-15 qyrkúıekte Álemdik jáne dástúrli dinder lıderleriniń VII sezi ótedi. Sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıası jáne qoǵam qaıratkerleri, halyqaralyq uıymdar músheleri qatysady.

Aldaǵy dinı forýmnyń ereksheligi Rım Papasy Frantsısktiń, ál-Azhardyń Joǵarǵy ımamy Ahmed Mohammed Ahmed at-Taıebtiń, Ierýsalım Patrıarhy Teofıl III, Ashkenazdyń bas ravvıni Davıd Laýdyń, Izraıldiń Bas sefard ravvıni Itshak Iosıftiń jáne basqa da dinı jetekshilerdiń, sondaı-aq birqatar halyqaralyq uıymdardyń ókilderiniń qatysýy bolady.

Rım Papasy Frantsısk 14 qyrkúıekte elordada messa ótkizedi. Oǵan 3 myńǵa jýyq adam qatysatyny kútiledi.