Dinder arasyndaǵy erteńgi baılanysqa jol salynyp jatyr - Hamba Lama

ASTANA. QazAqparat - Álemdik jáne dástúrli dinder kóshbasshylarynyń VI sezi keleshektegi dinder arasyndaǵy qarym-qatynasqa búgin jol salyp otyr. Bul týraly sez barysynda Búkilálemdik býddıster federatsııasynyń vıtse-prezıdenti Hamba Lama Choıjıljav Dambajav aıtty, dep habarlaıdy QazAqparat tilshisi.

«Óte yńǵaıly ári mańyzdy alań bolyp tabylatyn sezge álemniń barlyq din basshylarynyń jınalyp, eń ózekti máselelerdi talqylap otyrǵanynyń zor máni bar. Kongreste sóılegen barlyq din kóshbasshylary Qazaqstannyń beıbitshilikke bastaǵan barlyq bastamasyn sózsiz qoldaıdy. Men erteń qol qoıylar sezdiń Deklaratsııasynda Qazaqstannyń osynaý bastamalarynyń barlyǵy da qamtylar dep úmittenemin», - dedi Hamba Lama.

Ol sonymen birge qorshaǵan orta týraly da sóz qozǵady.

«Qorshaǵan ortany qorǵaý máselesi búgingi tańda ótkir máselege aınalyp otyrǵany ótirik emes. Mine, sondyqtan bizdiń bárimiz qorshaǵan ortaǵa zııan kelmeıtindeı sharýaǵa úles qosyp jatyrmyz. Qorshaǵan ortanyń buzylyp bara jatqanyna bárimiz de kináli ekenimizdi umytpaýymyz kerek», - deıdi dinı qaıratker.

Hamba Lamba sonymen qatar álemdegi barlyq dinderdiń máni - beıbitshilik ekenin tilge tıek etti.

«Biz búgin keleshektegi yntymaqtastyqqa jol salǵaly otyrmyz. Barlyq dinder, Islam bolsyn, Hrıstıan nemese Býddızm bolsyn adamdar arasyndaǵy beıbitshilikti kózdeıdi. Eki álemdi, atap aıtqanda adamdardyń oıy men halyqtardyń arasyndaǵy beıbitshilikti qalaı biriktiremiz? Bizdiń beıbitsúıgish oılaý júıemizdi saqtaý úshin búgin ne isteıtinimizdi, erteń qandaı sharýany atqaratynymyzdy aıqyndap alýymyz kerek», - deıdi ol.

Oǵan jıyn barysynda Mıanmadaǵy dinı ahýalǵa qatysty suraq qoıyldy.

«Biz Mıanmadaǵy býddıstermen baılanys ustap otyrmyz. Jaǵdaıdyń bári túsinikti. Atalmysh ahýaldyń sońy beıbitshilikpen aıaqtalar degen úmitimiz zor», - dedi býddıst.

Eske sala ketsek, elordada QR Prezıdenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI seziniń alǵashqy kúni ótti. Sezd barysynda Qazaqstan Prezıdenti Nursultan Nazarbaev memleketter arasyndaǵy senimdi nyǵaıtyp, qaýipsiz álemdi qalyptastyrý jolynda konfessııaaralyq, órkenıetaralyq dıalog ortalyǵyn bekitýge daıyn ekenin málimdedi.