Dinbasy biliktiligin jetildirgen ımamdarǵa dıplomdar tapsyrdy
ASTANA. 27 jeltoqsan. QazAqparat - Búgin Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli haziret Almatydaǵy ımamdardyń bilimin jetildirý Islam ınstıtýtynda 4 aılyq dinı kýrsty támamdaǵan dindarlarǵa dıplom tabystady,
dep habarlady Qazaqstan musylmandary dnı basqarmasynyń baspasóz qyzmeti.
Saltanatty sharada Bas múftı ımam-moldalardy el ıgiligi jolynda qyzmet etýge shaqyrdy. «Dinge, elge qyzmet etý - saýapty da jaýapty jumys. Biz qashanda ıgi bastamalardyń basy-qasynda bolýymyz kerek. Erteń aýylǵa barǵanda jurt tańyrqaı qarap: «Myna molda Almatydaǵy Islam ınstıtýtynda oqyp kelgeli beri bilimi tolysyp, minezi jaqsarypty» degen oı-pikirde qalýy kerek. Sondyqtan osy jerde alǵan dinı ilimderińizdi, tájirıbelerińizdi eldiń ıgiligine jumsańyzdar. Jamǵatqa jaqsylyq jasap, halyqtyń birligi men yntymaǵy jolynda aıanbaı eńbek etińizder», - dedi Dinbasy.
4 aılyq dinı kýrstan ótken dindarlardyń sany - 33. Onyń 9-y úzdik baǵamen támamdaǵandar. Dáriste jaqsy minez-qulqymen ózgege úlgi bolyp, kýrsta belsendilik tanytqan ımam-moldalar arnaıy alǵys hatpen marapattaldy. Ony QMDB Apparat basshysy Balǵabek Myrzaev, oqý-aǵartý bóliminiń meńgerýshisi Smaıyl Seıitbekov, kadr bóliminiń meńgerýshisi Baızaq Bekmuratovtar tabystady.
