Dinaralyq kelisim men beıbitshilikti damytýda parlamenttik dıplomatııanyń mańyzy zor

Atap aıtqanda, komıtet tóraǵasy Qazaqstan astanasyna besinshi márte kelip otyrǵan Majarstannyń Memlekettik Jınalysy Komıteti tóraǵasynyń orynbasary Marton Dendeshımen kezdesti. Onda mártebeli meıman Elbasy N.Á.Nazarbaevtyń qazaqstandyq qoǵamda beıbitshilik pen kelisimdi nyǵaıtý boıynsha júrgizip otyrǵan saıasatyna joǵary baǵa berdi. Óz kezeginde elderdiń tarıhı tamyrylastyǵyn atap ótken M.Áshimbaev Qazaqstan men Majarstan arasynda ekijaqty yqpaldastyqtyń áleýeti zor ekendigin atap ótti. «Qazaqstan Prezıdenti N. Nazarbaev dinder men konfessııalardy jaqyndastyrýda, álemde saıası mádenıettiń, dıalog pen árekettestiktiń taralýyna zor kúsh qosýda», - dedi depýtat M. Áshimbaev.

Al M. Dendeshıdiń aıtýynsha dinaralyq tatýlyq saıasatynda Qazaqstan men Majarstannyń tarıhı ustanymdary ortaq. «Máselen, Majarstanda da túrli etnostar men dinderdiń ókilderi ómir súrip jatyr. Sosyn majar halqy XVI ǵasyrdyń ózinde-aq túrli dinder arasyndaǵy beıbitshilik týraly deklaratsııa qabyldaǵan. Majarstan úshin Qazaqstan - erekshe el jáne erekshe áriptes, jáne bul bir-birinen qashyq elderdiń ózara baılanysy basqa memleketter úshin úlgi bola alady», - dedi meıman.

Sondaı-aq, búgin Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev Indonezııa Respýblıkasynyń Ókilder Palatasynyń depýtattary Mýhammad Arvanı Thomafı jáne H.Mýhlısınımen kezdesti. Onda Qazaqstan men Indonezııa arasyndaǵy saýda-ekonomıkalyq baılanystardyń, onyń ishinde týrıstik baılanystardyń nyǵaıýy máseleleri talqylandy. «Dinder terrorızmge qarsy» halyqaralyq konferentsııasynyń aıasynda ótken kezdesýde parlamentter arasyndaǵy baılanystardy nyǵaıtý qajettiligine nazar aýdaryldy. Taraptar bundaı kezdesýler parlamenttik dıplomatııanyń mańyzyn arttyratyndyǵyn atap ótti. Kezdesý barysynda M. Áshimbaev qonaqtarǵa Memleket basshysy N.Nazarbaevtyń «Álem. XXI ǵasyr» manıfestin tapsyrdy.