Dınara Jańabergenova BQO sanıtarııalyq-epıdemıologııalyq baqylaý departamentin basqarady

ORAL. KAZINFORM – QR Densaýlyq saqtaý mınıstrliginiń buıryǵymen Dınara Oljabaıqyzy Jańabergenova BQO sanıtarııalyq-epdemıologııalyq baqylaý departamentiniń basshysy laýazymyna taǵaıyndaldy.

Departamenttiń baspasóz qyzmetinen málim etkenindeı, jańa basshyny ujymǵa QR DSM Sanıtarııalyq-epıdemıologııalyq komıteti tóraǵasynyń orynbasary Maral Raqymjanova tanystyryp, aldaǵy ýaqytta qyzmetine sáttilik tiledi.

Dınara Oljabaıqyzy 1979 jyly Qyzylorda oblysy Jalaǵash aýdanynda dúnıege kelgen. 
Qorqyt ata atyndaǵy Qyzylorda memlekettik ýnıversıtetin dáriger-gıgıenıst, epıdemıolog mamandyǵy boıynsha bitirgen.

Eńbek jolyn 2002 jyly Jalaǵash aýdandyq SES-nyń eńbek gıgıenasy boıynsha sanıtarlyq dárigeri bolyp bastaǵan.

2005-2010 jyldary Jalaǵash aýdandyq memlekettik sanıtarııalyq-epıdemıologııalyq qadaǵalaý basqarmasynda epıdqadaǵalaý bóliminiń bastyǵy, 2010-2012 jyldary Qyzylorda oblysy boıynsha memlekettik sanıtarııalyq-epıdemıologııalyq qadaǵalaý departamenti taǵam nysandaryn sangıgqadaǵalaý bóliminiń bas mamany boldy. 

Sondaı-aq 2012-2017 jyldary Syrdarııa aýdandyq tutynýshylardyń quqyqtaryn qorǵaý basqarmasynyń basshysy, 2017-2020 jyldary Qyzylorda oblysy taýarlar men kórsetiletin qyzmetterdiń sapasy men qaýipsizdigin baqylaý departamenti tamaqtaný obektilerindegi ınfektsııalyq emes aýrýlardy baqylaý jáne qadaǵalaý bóliminiń basshysy, 2020 jyly Qyzylorda oblysy sanıtarııalyq-epıdemıologııalyq baqylaý departamenti tamaqtaný obektilerin baqylaý jáne qadaǵalaý bóliminiń basshysy qyzmetterinde boldy.

Osy qyzmetke taǵaıyndalǵanǵa deıin 2021-2024 jyldary Qyzylorda oblysy sanıtarııalyq-epıdemıologııalyq baqylaý departamentiniń basshysy laýazymyn atqardy.

Eske sala keteıik, budan buryn Batys Qazaqstan oblysynyń bas memlekettik sanıtar dárigeri qyzmetinen ketkenin jazǵan bolatynbyz.