Dınara Zákıeva jalǵyzbasty erlerdiń bala asyrap alýyna qarsy shyqty

ASTANA. KAZINFORM — Keshe elimizdiń Konstıtýtsııalyq soty erler men áıelder bala asyrap alǵysy keletinderdiń tiziminde teń dárejede ekenin jetkizdi. Osy oraıda sala mamandary bul sheshimniń qanshalyqty oryndy-orynsyz ekenine toqtaldy. 

Bala quqyqtary jónindegi ýákil Dınara Zákıeva usynylǵan ózgeristermen kelispeıtinin bildirip, balalardy resmı nekede turmaǵan er adamdardyń qamqorlyǵyna berýge tyıym salý kerektigin aıtyp otyr. 

«Men jáne bala quqyǵyn qorǵaý komıteti osy máseleni talqylaý kezinde qoldanystaǵy zańnamaǵa sáıkes nekede turmaǵan er adamdarǵa bala asyrap alýǵa salynǵan tyıymdy kúshinde qaldyrý qajet degen ustanymnan aınyǵan joqpyz», — deıdi Dınara Zákıeva. 

Ýákil Konstıtýtsııalyq sottyń sheshimi aıasynda zańnamaǵa ózgeris engizý kezinde balalardyń qaýipsizdigin qamtamasyz etýdiń barlyq tetigin qarastyrý qajettigin atap ótti.

«Bala asyrap alýǵa nıettilerge qoıylatyn sharttardy qatańdatý, sondaı-aq olardyń asyraýshy ata-ana mektebinde oqyp, bilimin jetildirýin talap etý kerek sııaqty. Sonymen qatar, balany baýyryna basqan ata-anany Balalardy qoldaý ortalyqtary arqyly súıemeldeý kózin qarastyrǵan jón», — dep tolyqtyrdy balalar ombýdsmeni. 

Buǵan deıin qoǵam qaıratkeri ári kópbalaly áke Nurken Halyqbergen pikirin bildirgen bolatyn.

Ol bala asyrap alý máselesinde kemsitýshilik nemese jynystyq teńdik máselelerin emes, eń aldymen balanyń múddesin eskerý kerek dep sanaıdy. 

Aıta ketsek, QR Konstıtýtsııalyq soty Neke jáne otbasy týraly kodekstiń 91-baby 2-tarmaǵynyń 11-tarmaqshasyn Konstıtýtsııaǵa sáıkes emes dep tanydy. 

Osylaısha Konstıtýtsııalyq sot erler men áıelder bala asyrap alǵysy keletinderdiń tiziminde teń dárejede ekendigin jetkizip otyr.