Dınara Zákıeva Túrkistan oblysyndaǵy balalar lagerinde bolǵan jaǵdaıǵa qatysty pikir bildirdi
Bala quqyqtary jónindegi ýákildiń aıtýynsha, balalarǵa lager unap jatyr. Alaıda uzaq ýaqyttan beri jóndeý jumystary júrgizilmegendikten, ǵımarat óte eski ári balalarǵa durys jaǵdaı jasalmaǵan.
«Balalarmen sóılesip, jaǵdaılaryn qarap shyqtym. Qazir lagerde aýysym basynda bolǵan 600 balanyń 190-y ǵana qalǵan eken. Qalǵanyn ata-analary úıge alyp ketken. Balalar lagerdi ózderi kórsetip shyqty. Baǵdarlama, tárbıeshiler jáne bul jerde ótkizgen ýaqyttary unap jatyr deıdi. Biraq lagerde balalarǵa durys jaǵdaı jasalmaǵan. Uıymdastyrýshylar jalǵa alyp, balalarǵa qyzmet kórsetip jatqan ǵımarattary óte eski. Aǵymdaǵy jóndeý jumystarynyń ózi kópten júrgizilmegen sııaqty. Qabyrǵalardyń boıaýy opyrylyp túsip jatyr, bólmelerde 12 kereýetten, bári eski. Barlyǵy tozǵan kúıde. As úıde keıbir azyq-túlik saqtaý normalary saqtalmaǵan. Dárethanalary dalada, qazirgi jaǵdaıy nashar. Ony ǵımarattyń ishinde salýǵa da bolýshy edi. Basseın múldem jumys istemeıdi, ákimshilik ony tazalap jatyrmyz dedi, degenmen ol da jóndeýdi talap etedi», – deıdi Dınara Zákıeva.
Onyń aıtýynsha, qazir memlekettik organdar lagerde tekseris júrgizip jatyr. Jalpy, Túrkistan oblysynda tek 6 memlekettik lager bar. Balany jazǵy demalyspen qamtý úshin ákimdikter jeke menshik lagerlerge memlekettik tapsyrys beredi. Qazir munyń biryńǵaı tásil, ereje, standarttary men talaptary joq. Sondyqtan Bala quqyqtary jónindegi ýákil aldymen zańdy ózgertý kerek ekenin aıtty. Sonymen qatar Túrkistan oblysyna barǵannan keıin barlyq lagerdi tekserip shyǵýdy josparlap otyrǵanyn jetkizdi.
«Birinshiden, biryńǵaı erejeler men talaptardy engizý kerek. Ekinshiden, lagerler ashylǵany týraly memlekettik organdardy habardar etý kerek. Sebebi qazir lagerdi ashý úshin tek Tótenshe jaǵdaılar basqarmasy men SES-ten ruqsat alý jetkilikti. Osylaısha, lagerdi kez kelgen mekeme ashyp júr. Saıram aýdanyndaǵy memlekettik lagerlerdiń birine de baryp keldik. Ondaǵy jaǵdaı sál jaqsyraq, degenmen dárethana men basseın onda da qorqynyshty kúıde. Dárethana taǵy da dalada. Munyń bárin ákimdik ókilderine jetkizdik. Sonymen qatar, Tólebı aýdanynda ornalasqan EQB balalarǵa arnalǵan MÁM-ge de baryp keldik.
Jalpy, elimizde 120 memlekettik, 98 jeke menshik lager, 900 shatyrly, 9,5 myń mektep janyndaǵy lager bar. Áriptesterimmen birge endi barlyq lagerdi tekserip shyǵýdy josparlap otyrmyz. Sondaı-aq, ákimdiktermen memlekettik lagerlerdiń bárinde jóndeý jumystaryn júrgizýdi pysyqtaǵymyz keledi», – dep jazdy Dınara Zákıeva Facebook-tegi paraqshasynda.
Aıta keteıik, jýyrda Memleket basshysy Qasym-Jomart Toqaevtyń ókimimen Dınara Bolatqyzy Zákıeva Qazaqstan Respýblıkasyndaǵy Bala quqyqtary jónindegi ýákil laýazymyna taǵaıyndalǵan bolatyn.
