Dınara Zákıeva «Tumystyq zorlyq-zombylyqqa qatysty zańǵa» qarsy petıtsııaǵa pikir bildirdi
ASTANA. KAZINFORM – QR Bala quqyqtary jónindegi ýákil Dınara Zákıeva tumystyq zorlyq-zombylyqqa qatysty zańǵa qarsy onlaın petıtsııa avtorlarynyń sózin joqqa shyǵardy. Bul týraly Dınara Zákıeva facebook paraqshasynda málimdedi.
Dınara Zákıevanyń aıtýynsha, petıtsııa avtorynyń negizgi ıdeıasy — bul zań tárbıe protsesin qylmystyq jaýapkershilikke tartady, balalardy tartyp alýdyń qarapaıym mehanızmin engizedi jáne azamattardyń jeke isine aralasý quqyǵyna ıe qurylym quraıdy.
«Bul múldem ótirik! Bul zańda balalardy tartyp alý týraly birde-bir norma joq. Osy zań arqyly el Prezıdenti Qasym-Jomart Toqaev qoǵamda zorlyq-zombylyqqa jol bermeý mádenıetin damytý, adamdy, onyń ishinde balany uryp-soǵýǵa jol bermeıtin, zańdylyq pen tártip aldyńǵy qatarda bolatyn qoǵam qurý mindetin qoıdy», — dedi Zákıeva.
Zakıeva zańǵa qarsy shyqqandardy daǵdarys ortalyǵynda nemese otbasyn qoldaý ortalyǵynda erikti bolýǵa shaqyrdy. Sonda ǵana zorlyq-zombylyq qurbandarynyń basynan qandaı jaǵdaı ótkenin túsinýge bolady. Ol qıyn ómirlik jaǵdaıdan shyǵýdy qajet etetin otbasylarǵa kómek kórsetýge keńes beredi. Mysaly, qujattaryn qalpyna keltirý, olardy emdeý, jumysqa ornalasý sııaqty máseleler.
Sonymen qatar, petıtsııaǵa 24 saǵat ishinde eki júzden astam adam qol qoıdy.
«Elimizdiń 220 eldi mekenin aralap shyqtyq. Áýeli bul zańnyń qajet emestigin alǵa tartpas buryn, avtorlarǵa da sol jolmen júrip ótýdi usynamyn. Bárimiz de qalam terbep, sóz saptaı alamyz. Alaıda sońǵy nátıje tek naqty is-áreket, soǵan jasalǵan qadam men kúndelikti jumys arqyly ǵana kórinedi. Qaýipsiz qoǵamda ǵana damı alatyn eldiń amandyǵy týraly bárimiz aıtyp júrmiz. Eldiń amandyǵy otbasynyń, árbir qoǵam múshesiniń, sonyń ishinde balanyń amandyǵynan turady», - dep jazdy Bala quqyqtary jónindegi ýákil Dınara Zákıeva.
