Dınara Zákıeva: Saltanat Núkenovanyń ólimine qatysty faktiler qasaqana burmalanýy múmkin
ASTANA. KAZINFORM – Jaqynda Saltanat Núkenovanyń ólimine qatysty atyshýly istiń soty bastalady. Almatyda óltirilgen 4 jasar balanyń soty júrip jatyr. Aqpan aıynyń ortasynda Almaty oblysyndaǵy 3 jasar egizder men olardyń úlken ápkesin zorlaý isi boıynsha sot bastalady. QR Bala quqyqtary jónindegi ýákil Dınara Zákıeva Instagram paraqshasyna Saltanat Núkenovanyń isi boıynsha sotqa deıin nemese sot protsesinde sottalýshyny aqtaý úshin faktilerdi qasaqana burmalaýǵa áreket jasalýy múmkin degen maǵynada alańdaýshylyq tanytyp, jazba qaldyrdy.
«Áıelder men balalarǵa zorlyq-zombylyq kórsetý, jaqyndarynyń qolynan qaza tabý sekildi kópshilikti dúrliktirgen osyndaı sumdyq oqıǵalar qoǵamdaǵy úlken máseleniń jarasyn ashyp otyr» — deıdi jazbasynda Dınara Zákıeva.
Kún saıyn qylmys týraly habarlamalar alyp, balalar men áıelderdiń basynan ótkergen ádiletsizdik pen azapty kórip, áli kúnge deıin belgisiz sebeptermen, kónetinin sondaı-aq adamgershilikke jatpaıtyn kózqarastardyń saldarynan turmystyq zorlyq-zombylyqty aqtaýǵa bolatynyna senetin adamdar bar ekenine kózi jetkenin jazady.
«Qazir Saltanat Núkenovanyń isi boıynsha sotqa deıin nemese sot protsesinde sottalýshyny aqtaý úshin faktilerdi qasaqana burmalaýǵa áreket jasalatyny týraly aqparat bar. Keı adamdar bul medıa naýqanǵa kirisip ketti. Buǵan adamdardyń qalaı qatysa alatynyn, zorlyq-zombylyqty qalaı aqtaýǵa bolatynyn túsiný múmkin emes. Atalǵan is boıynsha ádil sot jazadan qutylý múmkin emestigi týraly naqty sıgnal bolýy tıis» — deıdi QR Bala quqyqtary jónindegi ýákil.
Onyń pikirinshe, kez kelgen zorlyq-zombylyq úshin jaza jeńildiksiz, zańdy jáne eń aýyr bolýy kerek.
«Álbette, zorlyq-zombylyqpen kúreste qatań zań kerek. El Prezıdentiniń tapsyrmasyna sáıkes biz depýtattar, memlekettik organdarmen birlesip qyrkúıek aıynyń basynda zań jobasyn ázirledik, ol qazir Májilis qaraýyna berildi. Sonymen birge Memleket basshysy zorlyq-zombylyqqa qarsy kúrestiń basty faktory qoǵamda «zańdylyq pen quqyq tártibi» qaǵıdatyn saqtaı otyryp, agressııa men zorlyq-zombylyqtyń kez kelgen túrine „nóldik tózimdilik“ damytý bolýy kerektigin atap ótti. Al bul bizge baılanysty. Azamatsha, áıel jáne Qazaqstan Respýblıkasyndaǵy Bala quqyqtary jónindegi ýákili retinde men sot barysyn jiti qadaǵalaıtyn bolamyn. Qoǵam retinde áıelder men balalarǵa qatysty zorlyq-zombylyqtyń árbir jaǵdaıynda ádildik izdeýimiz kerek», - dep jazdy Dınara Zákıeva.
