Dınara Zakıeva Qostanaıdaǵy 5 jasar qyzdy zorlaǵan jaǵdaıǵa qatysty túsinik berdi

ASTANA. KAZINFORM — Bala quqyqtary jónindegi ýákil Dınara Zakıeva Qostanaıda kámeletke tolmaǵan jasóspirimderdiń 5 jasar qyzdy zorlaýyna qatysty jaǵdaıǵa resmı túsinik berdi.

Ol bul is boıynsha Qostanaı oblystyq komıssary jáne polıtsııasymen jumys istep jatqanyn aıtty.

— Kámeletke tolmaǵandar tobynyń bes jasar qyzǵa zorlyq-zombylyq kórsetý faktisine qatysty, qazirgi ýaqytta qylmystyq is qozǵalyp, saraptama taǵaıyndalǵanyn habarlaımyn. Biz Qostanaı oblysy boıynsha oblystyq komıssarmen jáne Іshki ister departamentimen jumys istep jatyrmyz, — dep jazdy D. Zakıeva Instagram paraqshasynda.

Qostanaı oblysy boıynsha aımaqtyq komıssar Nesibeli Básenova da resmı túrde túsinik berdi. Ol ótinish bergen kúni anasymen kezdeskenin aıtty.

— Bes jasar qyzdyń kámeletke tolmaǵandar tobyna qatysty zorlyq-zombylyq faktisi boıynsha qazirgi ýaqytta óndiristegi qylmystyq is júrgizilip jatqanyn habarlaımyn, saraptama taǵaıyndaldy. Sonymen qatar, 2024 jyldyń 25 shildesinde juma kúni jábirlenýshi qyzdyń anasymen Qostanaı oblysy boıynsha óńirlik ýákil retinde maǵan júgingen kúni kezdestim, áńgime júrgizilip, psıhologııalyq kómek kórsetildi. Іstiń mán-jaıy anyqtaldy. Balany qaıta áleýmettendirý úshin psıhologııalyq-pedagogıkalyq qoldaý kórsetý maqsatynda «Qostanaı qalasynyń bilim bólimi» MM praktıkalyq psıhologııa bólimimen jábirlenýshi qyzdy jáne onyń anasyn joba sarapshysynyń psıho-túzetý súıemeldeýimen «kámeletke tolmaǵandardyń jynystyq qol suǵylmaýshylyǵy men erte júktiliginiń aldyn alý» jobasyna qosý usynyldy, — dep jazdy N.Basenova Instagram paraqshasynda.

Bul is Bala quqyqtary jónindegi ýákil men prokýratýranyń baqylaýynda ekeni aıtyldy.

Buǵan deıin Qostanaıda bes jasar qyzdyń zorlanǵany týraly habarlanǵan bolatyn.