Dınara Zákıeva boksshy Beıbit Shúmenov týraly: Qylmystyq jaýapqa tartý kerek

ASTANA. QazAqparat – QR Bala quqyqtary jónindegi ýákil Dınara Zákıeva boksshy Beıbit Shúmenov qatysqan tóbeles boıynsha Іshki ister mınıstrligine júgingenin málim etti, dep habarlaıdy QazAqparat tilshisi.

«Іshki ister mınıstrligine qylmystyq áreket jasaǵan tulǵanyń jábirlenýshiniń qolynda bolǵan balanyń ómiri men densaýlyǵyna qaýip tóndirgenin eskerý qajettigi týraly júgindim. Balaǵa qaýip tóný faktisi áleýmettik jelilerde jarııalanǵan beınekadrlarda anyq kórinedi», - dep jazdy ýákil Facebook paraqshasynda.

Sondaı-aq, ol óz laýazymy aıasynda ulttyq zańnamaǵa bala qaýipsizdigimen baılanysty ózgertýler engizýdi josparlap otyrǵanyn málim etti.

«Bul jaǵdaıda tulǵany Qylmystyq kodekstiń 115-baby («Qorqytý») boıynsha da jaýapqa tartý qajet dep oılaımyn. Qoldanystaǵy zańnamada balanyń qaýipsizdigi men densaýlyǵyna qaýip tóndiretin jaǵdaı týǵyzý áreketine jaýapkershilik kózdeıtin bap joq. Balalardyń qaýipsizdigin qamtamasyz etý máseleleri boıynsha zańnamaǵa daıyndalǵan ózgerister blogyna tıisti usynys engizemin. Jalpy, biz, eresekter, kez-kelgen jaǵdaıda balalar týraly oılaýymyz kerek», - dep jazdy Dınara Zákıeva.