Dınara Zakıeva: Balalardy qorǵaý salasyndaǵy eń mańyzdy oqıǵa – Bala quqyǵyn qorǵaý basqarmalarynyń qurylýy
ASTANA. KAZINFORM – Búginde Qazaqstanda bala quqyqtary zańnamalyq jáne ınstıtýtsıonaldyq deńgeıde bekitilgen. Prezıdent Qasym-Jomart Toqaevtyń tapsyrmasymen keıingi birneshe jylda balalardy qorǵaý júıesi men ınfraqurylymyn qalyptastyrýǵa baǵyttalǵan mańyzdy reformalar júrgizilip, zańdar men baǵdarlamalar qabyldandy. Bul týraly Bala quqyqtary jónindegi ýákil Dınara Zakıeva áleýmettik jelide jazdy.
Ol qoldanystaǵy barlyq mehanızm men aldaǵy jyldarǵa arnalǵan is-qımyl jospary, jumysty jetildirý, jańa tásilderdi engizý, qyzmetkerlerdi oqytý, jalaqy arttyrý, sondaı-aq qaýipsizdik, áleýmettik qorǵaý, densaýlyq saqtaý jáne bilim berý salalaryndaǵy ózekti mindetterdi sheshý máseleleri jyl basynda qabyldanǵan «Qazaqstan balalary» ulttyq strategııasy men baǵdarlamasynda kórinis tapqanyn atap ótti.
– Búgin dástúrli túrde Halyqaralyq balalardy qorǵaý kúni atalyp ótedi. Árbir balaǵa arnap, óńirlerdegi kezdesýlerde jıi aıtatyn sózimizdi taǵy da qaıtalaǵym keledi: «Bala – eń joǵary qundylyq. Balalarǵa qamqorlyq jasaý – memlekettiń basty basymdyǵy. Memleket basshysy Qasym-Jomart Toqaev bala qorǵaý jáne qoldaý máselelerine árdaıym erekshe kóńil bóledi. Ár balanyń ómiri mańyzdy, onyń quqyqtary, ál-aýqaty, qaýipsizdigi memleket qorǵaýynda. Osy maqsatta elimizde barlyq qajet zań qabyldanyp, arnaıy qyzmetter quryldy jáne áli de qurylyp jatyr. Árqaısyńyz balalar qorǵaýshysy bola alasyzdar. Eń bastysy – ózińizge nemese basqa balaǵa kómek qajet bolǵan jaǵdaıda bul týraly aıtýǵa jáne habarlaýǵa qoryqpańyzdar, - dedi Dınara Zakıeva.
Onyń aıtýynsha, balalardy qorǵaý salasyndaǵy eń mańyzdy oqıǵalardyń biri – 2024 jyldan beri júrgizilgen jumys nátıjesinde ár óńirlik ákimdikter qurylymynda Balalardyń quqyqtaryn qorǵaý basqarmalarynyń qurylýy.
Olardyń qurylýy men qyzmetteri «Bala quqyqtary týraly» zańda bekitildi. Barlyq qajet rásimder ótip, qaýlylar qabyldandy, qurylym men shtat qalyptastyryldy.
– Bul – balalardy qorǵaý salasy úshin úlken jetistik. Buǵan deıin jergilikti atqarýshy organdar júıesinde balalardyń quqyqtaryn qorǵaýmen aınalysatyn jeke qurylym bolǵan joq. Osyǵan baılanysty biz sizderdi óńirlik Balalardyń quqyqtaryn qorǵaý basqarmalarymen tanystyryp, paıdaly aqparatpen bóliskimiz keledi,- dedi Bala quqyqtary jónindegi ýákil.
Sońǵy eki jylda Qazaqstanda balalardyń quqyqtaryn qorǵaý júıesin kúsheıtýge baǵyttalǵan 11 zań men baǵdarlama qabyldandy. Sonymen qatar 158 naqty sharany qamtıtyn «Qazaqstan balalary» baǵdarlamasy iske qosyldy. Bul týraly Qazaqstan Respýblıkasyndaǵy Bala quqyqtary jónindegi ýákil Dınara Zakıeva Astanada ótken Silk Power 2026 alańynda málimdedi.
