Dınara Zákıeva: Árbir tsıfrdyń artynda áıel nemese balanyń ómiri tur
ASTANA. KAZINFORM – Qazaqstan Respýblıkasyndaǵy Bala quqyqtary jónindegi ýákil Dınara Zákıeva Kazinform agenttigi tilshisiniń «Zańǵa qol qoıýdy úlken ózgerister dep ataýǵa bola ma?» degen saýalyna jaýap berdi.
«Memleket basshysy jyl basynda zorlyq-zombylyqqa qarsy kúrestiń eń mańyzdy qaǵıdatyn – qoǵamda osy zulymdyqqa múldem tózbeýshilikti damytýdy atap kórsetti. Al bul zań zorlyq-zombylyq úshin jazanyń bultartpastyǵy qaǵıdatyn qamtamasyz etetin osy postýlattyń naqty kórinisi bolýǵa arnalǵan», - dep qosty D.Zákıeva.
Qazaqstan Respýblıkasyndaǵy Bala quqyqtary jónindegi ýákildiń málimetinshe, áıelder men balalarǵa qatysty turmystyq zorlyq-zombylyq salasyndaǵy statıstıka kún saıyn balalarǵa qatysty 6 qylmystyq quqyq buzýshylyq jasalyp, 342-den astam adam zorlyq-zombylyqqa ushyraıtynyn kórsetip otyr.
«Tek 2023 jyly Qazaqstanda turmystyq zorlyq-zombylyq saldarynan 69 áıel men 7 bala qaıtys boldy; turmystyq zorlyq-zombylyqqa qatysty 99 myńnan astam aryz túsip, balalarǵa qatysty 2452 qylmys jasalǵan. Árbir sannyń artynda áıel nemese balanyń ómiri tur», - dep atap ótti D.Zákıeva.
Jalpy, zańnyń negizgi erejeleri ótken jyldyń qyrkúıek aıynda Bas prokýratýra men Májiliske usynylǵannan keıin áleýmettik jeliler men BAQ-ta jarııalanǵan bolatyn. Odan ári túzetýler túrli alańdarda 100-den astam ÚEU ókilderimen, qoǵam belsendilerimen, sondaı-aq Májilis pen Senattaǵy jumys toptarynda talqylandy.
«Endi ýákiletti organdarmen birlese otyryp, zań normalaryn júzege asyrýǵa kirisemiz. Osylaısha, aldaǵy 2 aıdyń ishinde biz memlekettik organdarmen bekitilgen zańnyń erejeleri men normatıvtik-quqyqtyq aktileriniń tujyrymdamalaryn bekitemiz. Odan keıin otbasyn qoldaý ortalyqtaryn, psıhologııalyq qoldaý ortalyqtaryn ashýǵa, mobıldi toptardy qurýǵa qatysty normalardy iske asyrýǵa qatysty ákimdiktermen jumys isteıtin bolamyz. Sonymen qatar, uryp-soǵýǵa, densaýlyqqa jeńil zııan keltirýge qatysty jazalaý, qylmystyq jaýapkershilikke qatysty normalardyń oryndalýyna keletin bolsaq, kúndelikti jumys kezinde, 111 nómirine kelip túsken ótinishter arqyly da zańnyń saqtalýyn turaqty túrde qadaǵalaıtyn bolamyz, – dep atap ótti Qazaqstan Respýblıkasyndaǵy Bala quqyqtary jónindegi ýákil.
Bul zańda balalardy áketýge, ata-ana quqyǵyn shekteýge nemese aıyrýǵa qatysty ózgertýler men tolyqtyrýlar joq. Munyń negizderi «Neke (erli-zaıyptylyq) jáne otbasy týraly» Kodekste bekitilgen jáne 2011 jyldan beri qoldanylyp keledi. Máselen, qazir 12 myń bala áleýmettik jaǵynan az qamtylǵan otbasynda turady. D.Zákıeva bul rette otbasy baqylaýda ekeni eskerilip, balalar óz úılerinde, jergilikti atqarýshy bılik tarapynan qajetti profılaktıkalyq jumystar júrgiziletinin túsindirdi.
