Zákıeva balalar úıindegi másele týraly: oblys ákimdigi qaýipsizdikti qamtamasyz etpedi

ASTANA. KAZINFORM — Bala quqyqtary jónindegi ýákil Dınara Zákıeva Almaty qalasyndaǵy (Baǵanashyl) Almaty oblystyq balalar úıiniń tárbıelenýshilerin kóshirý jaǵdaıyn túsindirdi. 

— Búgin balalar úıiniń tárbıelenýshileri emes, ómirlik qıyn jaǵdaıǵa tap bolǵan ortalyqtyń balalary kóshirildi. Ortalyqta ómirlik qıyn jaǵdaıǵa tap bolǵan jáne oblystyń ártúrli bólikterinen kelgen balalar ýaqytsha turady. Kóktemde balalar men ákimdik arasyndaǵy kezdesýdiń qorytyndysy boıynsha, ortalyqta turyp jatqan balalar men mekemeniń ózi kóshetini sheshilgen bolatyn, bul aqparatty men kóktemde jarııalaǵanmyn. Keshe bul týraly oblystyq bilim basqarmasynyń resmı paraqshasynda habarlady, — dep jazdy áleýmettik jelidegi paraqshasynda Dınara Zákıeva. 

Sondaı-aq balalar ombýdsmeni Almaty oblysynyń ákimdigi ortalyqta turatyn balalardy kóshirý kezinde qaýipsizdikti qamtamasyz etpegenin tilge tıek etti. 

— Sonyń saldarynan búgin jol berilmeýi tıis jaǵdaı boldy. Balalar úıinde tárbıelenýshi qyz esinen tanyp qaldy, bir balanyń aıaǵy jaraqattandy. Osy jaǵdaı boıynsha, balalardan kelgen habarlamadan keıin, ákimdikke sońǵy apta ishinde birneshe ret júgindim. Alaıda jergilikti atqarýshy organ habardar etpeı, kelisilmegen áreketti júzege asyrdy. Barlyq jaǵdaı boıynsha Prezıdent Ákimshiligi tekserý júrgizedi, arnaıy top quryldy. Óńirlik ýákilmen birge balalarǵa bara jatyrmyn, — deıdi ol.

Buǵan deıin belgili bolǵandaı «Baǵanashyl» balalar úıi Almatydan Qonaevqa kóshirilmeıtin boldy.