№1 balalar úıiniń tárbıelenýshileri Almatyda qalatyn boldy
ASTANA. KAZINFORM — Qazaqstandaǵy bala quqyqtary jónindegi ýákil Dınara Zakıeva Almaty qalasyndaǵy №1 balalar úıi tárbıelenýshileriniń kóshýine baılanysty jaǵdaıǵa pikir bildirdi.
2025 jyldyń 1 naýryzynda Almaty oblysyndaǵy Baganashyl yqshamaýdanynda ornalasqan № 1 balalar úıiniń tárbıelenýshileri jaqyn arada Qonaev qalasynan 20 shaqyrym jerde salynyp jatqan jańa úıge kóshetini belgili boldy.
— Men qazir Almaty oblysynda balalar úıiniń máselesi boıynsha balalardyń oblys ákimimen kezdesýine qatysyp otyrmyn, — dep jazdy Dınara Zakıeva áleýmettik jelidegi paraqshasynda.
Ol balalar úıiniń tárbıelenýshileri men Almaty oblysynyń ákimimen ótken kezdesýdiń qorytyndysy boıynsha kelesi aqparatpen bólisti:
Baganashyldaǵy balalar úıinde turyp jatqan balalar osy úıde qala beredi;
Jańa ǵımarat Núsipbaev atyndaǵy ınternattyń balalaryna beriledi (buǵan deıin ol jerde jaǵdaıdyń óte nashar ekenin jáne balalarǵa tıisti jaǵdaı jasalmaǵanyn jazǵan edim);
Jańa ǵımarattyń bir korpýsyn Kámeletke tolmaǵandardy beıimdeý ortalyǵyna beredi, ol jerge oblystyń barlyq aýdanynan kelgen balalar qabyldanady, osylaısha olardy qalaǵa tasýdyń qajeti bolmaıdy.
Qazaqstan Respýblıkasyndaǵy bala quqyqtary jónindegi ýákil bul másele boıynsha tolyq aqparatty aldaǵy ýaqytta ákimdik jarııalaıtynyn atap ótti.
Aıta ketelik Almaty oblysynyń №1 balalar úıiniń tárbıelenýshileri ǵımarattyń Almatydan Qonaevqa kóshiriletinine narazy ekeni týraly jazǵan edik.