Dınara Sádýaqasova shahmatty tegin úıretetin onlaın akademııa ashady
NUR-SULTAN. QazAqparat - Tanymal qazaqstandyq shahmatshy Dınara Sádýaqasova óz ádistemesimen shahmat úıretetin onlaın akademııa ashady. Onda kez kelgen adam tirkelip, shahmattyń qyr-syryn tegin úırene alady, dep habarlaıdy QazAqparat.
Jaqynda ǵana Azııa chempıony atanǵan Dınara «Shahmat barlyǵy úshin» jobasymen jumys istemek
«Joba arqyly shahmat oıynyn Qazaqstanda nasıhattaımyz dep úmittenemin. Bizdiń kózdegen maqsatymyz - barlyq óńirdegi halyqtyń túrli tobyna shahmat oıynyn úıretý. Sondyqtan, kez kelgen adam tegin tikele alatyn shahmattyń onlaın-akademııasyn ashýdy josparlap otyrmyz. Onda ózim de qatysyp, beınesabaqtar júkteımin», - dedi shahmatshy tilshilerge bergen suhbatynda.
Bul sabaqtar Dınara Sádýaqasovanyń jeke óz ádistemesimen júrgiziledi.
«Bizdiń ortalyqtyń bir ereksheligi - shahmat sabaqatryn qazaq tilinde úırenýge bolady. Bul joba arqyly ózge akademııalarmen básekeleskimiz kelmeıdi. Tek shahmatqa qyzyǵatyndarǵa úırený, oınaý múmkindigin syılaǵymyz keledi. Onlaın-sabaqtar shalǵaı aýyldaǵy balalarǵa nemese múmkindigi shekteýli jandarǵa qolaıly bolmaq», - dedi ol.
Uıymdastyrýshylardyń aıtýynsha, «Shahmat barlyǵy úshin» jobasyn qurý - grossmeısterdiń Qazaqstanda shahmat oıyndaryn damytýǵa jasaǵan úlken qadamdarynyń biri. Shahmattyń qoljetimdiligin arttyrý elimizdegi básekege qabiletti talantty jastar qataryn arttyrýmen teń. Shahmat - keıde jeńiske jetip, keıde jeńilip nemese ýaqytsha mámilege qol jetkizýge bolatyn ómirdiń qysqasha bir úlgisi sekildi. Árbir jeńis pen jeńilisten qorytyndy shyǵara bilý - árbir adamnyń boıynda sátsizdikti durys qabyldap, bolashaq mindetterdi durys qurýǵa kómektesedi.
Osy maqsatta Dınara Sádýaqasovanyń Shahmat akademııasy Qazaqstan aýmaǵy boıynsha úlken áleýmettik jumystardy júrgizip keledi. Shahmatshy arý bir mezgildik oıyn seanstaryn, sheberlik synyptary men týrnırlerdi tek elordada ǵana emes, Atyraý, Atyraý, Pavlodar, Aqtaý, Qyzylorda, Shymkent jáne ózge de óńirlerde ótkizdi.
