Dınara Sádýaqasova shahmattan erler arasyndaǵy QR chempıonatyna qatysady
ALMATY. QazAqparat - Almatyda Qazaqstan shahmat federatsııasynyń jattyqtyrýshylar keńesi ótip, 2-22 sáýir aralyǵynda ótetin 2017 jylǵy el chempıonatynyń fınalyna qatysýshylardyń tizimi bekitildi, dep habarlaıdy QazAqparat tilshisi.
Saıysqa Qazaqstannyń 22 úzdik shahmatshysy qatysady.
Áıelder arasyndaǵy aqtyq synda jaqynda ǵana erlerdiń halyqaralyq sport sheberi ataǵyna ıe bolǵan Jansaıa Ábdimálik, Gúlishan Naqbaeva, Mádına Dáýletbaeva, senorlar arasyndaǵy álem chempıony Elena Ankýdınova men sońǵy ýaqytta jaqsy oıyn nátıjelerimen kózge túsip júrgen Aısezim Muhıt pen Arnash Baýyrjan qatysady.
Erler arasyndaǵy fınalda Qazaqstan chempıony ataǵy úshin elimizdiń qazirgi chempıony Petr Kostenko jáne Qazaqstan shahmatshylar reıtıngisinde 1-shi orynda turǵan Rınat Jumabaev, Murtas Qajǵalıev, Kırıll Kýderınov jáne ıýnıorlar Denıs Mahnev pen Janat Saın, Jandos Aǵmanov baq synaıdy.
Qazaqstan shahmat federatsııasynyń Qoǵammen baılanys bóliminiń mamany Roman Raıfeldiń aıtýynsha, tuńǵysh ret Qazaqstannyń erler arasyndaǵy chempıonatyna Dınara Sádýaqasova qatysady. Dınara Sadýaqasova - álemniń úzdik 40 shahmatshysy tizimine engen, jaqynda ǵana erlerdiń halyqaralyq sport sheberi ataǵyn alǵan Qazaqstan shahmat federatsııasynyń arnaıy nomınanty.
«Men Qazaqstan shahmat federatsııasyna ótinish jazyp, erler arasyndaǵy el chempıonatyna qatystyrýdy suradym. Meniń ótinishimdi qabyl alǵanyna qýanyshtymyn. Men kópten beri ártúrli týrnırlerde er adamdarmen synasyp kelemin. Bul jerde aıtarlyqtaı erekshelik kórip turǵanym joq», - dedi Dınara Sádýaqasova.
