Dınara Sádýaqasova shahmattan álem chempıony atandy
ASTANA. QazAqparat - Elordalyq shahmatshy Dınara Sádýaqasova Bhýbanesvarde (Úndistan) ótken shahmattan jastar arasyndaǵy álem chempıonatynda jeńiske jetti, dep habarlaıdy qala ákimdiginiń saıty.
Úndistanda 20 jasqa deıingi qyzdar arasyndaǵy álem birinshiliginde 57 sportshy bas júldeni sarapqa saldy.
Chempıonat barysynda Dınara Sádýaqasova kósh bastap, 13-tiń ishinen 9,5 ball jınady. Ekinshi orynǵa reseılik, úshinshi orynǵa úndistandyq shahmatshy ıe boldy.
FIDE qamqorlyǵymen ótken chempıonatty uıymdastyrǵan Bhýbanesvar KIIT ýnıversıtetiniń shahmattan Orıssa qaýymdastyǵy. Jarys shveıtsarııalyq júıe boıynsha 13 týrmen ótkizildi. Zııatkerlik shaıqas eki aptaǵa jalǵasty. Dınara qyzdar arasynda álem chempıony atandy, bul shahmatshylar arasyndaǵy eń mańyzdy ekinshi ataq. Alda jańa jeńister men eń mańyzdy týrnır - áıelder arasyndaǵy chempıonat bar.
Dınara Sádýaqasova - elimizde shahmattyń damýyna eleýli úles qosqan jas grossmeısterlerdiń biri. Elordalyq H.S. Omarov atyndaǵy shahmat klýbynda bes jasynan bastap tálim alyp júr. Dınara shahmatpen qatar mýzyka mektebiniń fortepıano synybyn úzdik aıaqtap, kórkemdik gımnastıkamen shuǵyldanǵan. Shahmatqa birjola bet burǵan ol segiz jasynda álemdik deńgeıdegi jarysta top jarady. Dınara Sádýaqasova úsh dúrkin álem chempıony, Azııanyń úsh dúrkin vıtse-chempıony jáne Qazaqstan chempıonatynyń birneshe dúrkin jeńimpazy.
